Дээд боловсролын салбарт авч хэрэгжүүлж байгаа зарим арга хэмжээний талаар Боловсрол, шинжлэх ухааны сайд Л.Энх-Амгалан дараах мэдээллийг өглөө.

Тэрбээр "Монгол Улсад 147 мянган оюутан 88 их дээд сургуульд суралцаж байна. Үүнээс их сургууль 34, дээд сургууль 46, коллеж найм байна. Харин үүний зөвхөн 14 их сургуульд 108 мянган оюутан суралцаж байна. Бидний цаашдаа барих бодлого бол шаардлага хангасан их дээд сургуулийг бий болгох.

Үйл ажиллагаа явуулж байгаа сургуулиудын сул тал нь хөдөлмөрийн зах зээлийн эрэлт, нийлүүлэлтээй уялддаггүй. Шинээр төгссөн боловсон хүчин гараад ажлын байргүй болох нийтлэг зовлон бий.

Тиймээс Засгийн газрын тогтоолоор 21 сургуулийн сургалтын үйл ажиллагааг зогсоож, татан буулгахаар боллоо.  Мөн 24 их сургуульд зургаан сарын хугацаатай үүрэг өгч байна. Хэрэв заасан хугацаанд шаардлага хангахгүй бол үйл ажиллагааг зогсооно" гэв.

Сургалтын үйл ажиллагааг зогсоож байгаа 13 сургуульд 163 багш 1567 оюутан бий. Өөрөөр хэлбэл нэг сургууль 40 хүрэхгүй оюутантай, подволд үйл ажиллагаа явуулж байж болохгүй. Мөн дээрх сургуульд суралцаж байгаа нэг ч оюутны эрх ашиг хөндөгдөхгүй бөгөөд илүү чанартай, нэр хүндтэй, эрэмбэ өндөр сургуульд шилжин суралцах боломж олгож байна.  

Т.Мөнхжаргал