ЗГХЭГ-ын дарга Д.Амарбаясгалан сэтгүүлчдийн асуултад хариулт өглөө.

Тэрбээр "Монгол Улсад олон нийтийн эрх ашгийг хувьдаа болон хөрөнгө чинээгээрээ далайлгаж завшиж байгаа хэсэг бүлэг хүмүүстэй тэмцэж эхэлсэн. Эрдэнэтийн 49 хувьтай, Хөтөл, Дарханы цементийн асуудалтай холбогдоно. Тэр цаг үеэс хойш Ерөнхий сайд болон түүнтэй хамт тэмцэж буй хэсгийг харлуулах, нэр хүндийг нь унагаах, олон нийтийн дунд нэр хүндийг нь унагаах, үл итгэх чиглэлийн ажлууд тогтмол хийгдэж эхэлсэн. 

Хамгийн сүүлд гэхэд Эрдэнэс Тавантолгой компанид Засгийн газрын бүрэн эрхт төлөөлөгч томилогдож олон жилийн туршид явж ирсэн бүлэглэлийн, хулгайн үйл ажиллагааг зохицуулах, хяналт тавин ажиллаж байна. Эдгээртэй холбоотойгоор Монгол Улсын Ерөнхий сайдын хэвийн үйл ажиллагаа явуулах нөхцөлд нь саад учруулах зорилготойгоор хэвлэл мэдээллээр зохион байгуулалтай олон зүйлийг явуулж байна. 

Төрд үнэнчээр, ард иргэдийнхээ эрх ашгийн өмнөөс зүтгэх зорилго агуулсан улстөрчид болон тодорхой албан тушаалтнуудад дарамт шахалт үзүүлж зогсоодог байсан нь надад ч бас мэдрэгдэж байна. 

Ардын нам дотор хагарал үүсжээ хэмээн зохион байгуулалттай зүйлийг явуулж байна. Ардчилсан намын дотоодод учраа олж чадаагүй, эрх мэдэлдээ улайрсан зарим нэг нөхдүүдийн хийж буй ажил хэмээн харж байна. 

Ардын намыг эв нэгдэлгүй болгож, төрийн ажил хэвийн тогтвортой явагдах нөхцөлийг алдагдуулснаараа сөрөг хүчин, сөрөг хүчнийг төлөөлөх гэж хичээж буй зарим нөхдүүдийн хүсэл хангагддаг юм болов уу хэмээн бодож байна. 

Эдийн засгийн нөхцөл байдал, улс оронд ирж буй дарамтыг амь нэгтэй байж даван туулах нь бидний зорилго. Албан тушаал, эрх мэдлийн төлөө тэмцэлдэж, нэг нь ерөнхий сайдаас бууж нөгөөх нь ерөнхий сайд болох үеийн төлөөлөл бид биш. Монгол Ардын нам бол эв нэгдлээрээ бусад улс төрийн намд үлгэр дуурайлал болохоор эв нэгдэлтэй нам. Хоорондоо тэмцэлдэх ямар ч учир шалтгаан байхгүй” гэв. 

Д.Батчулуун