БАРИМТ 1
Кармело Кияам Энтони нь 1984 оны тавдугаар сарын 29-нд АНУ-ын Нью Йорк хотод мэндэлсэн ба өдгөө 39 настай. Эцэг Кармело Ириарте нь Кармело Энтониг хоёр настай байхад нь хорт хавдрын улмаас нас барсан тул хүүхэд байх үеэсээ хүнд хэцүү амьдралыг туулж эхэлсэн.
БАРИМТ 2
Түүний эцэг Кармело Ириартегийн хувьд Пуэрто Рико хүн байсан бол, эх Мэри Энтони нь Африк гаралтай америк хүн. Багаасаа ялгаварлан гадуурхалтын дунд өссөн тэрбээр NBA-ийн тоглогчдын эрх тэгш байдлыг хамгаалахыг тулд олон удаа ам нээж байсан удаатай.
БАРИМТ 3
Кармело Энтониг найман настай байхад гэр бүл нь Балтимор гэх гэмт хэрэг болон хар тамхины хэрэглээ маш өндөртэй бүс газар луу нүүсэн. Хагас өнчин бяцхан хүүг эргэн тойрны сөрөг нөлөөллөөс нь аварч чадсан зүйл бол спорт байсан гэж Кармело Энтони дурсдаг.
БАРИМТ 4
Кармело Энтони ахлах сургуулийн эхний жилдээ сургуулийнхаа сагсанбөмбөгийн шигшээ багаас хасагдаж байсан удаатай ч бууж өгөлгүй хөдөлмөрлөсний үр дүнд Сиракусын их сургуулийн төлөө NCAA-д тоглох эрхтэй болсон.
БАРИМТ 5
Тэрбээр их сургуулийн багийн төлөө тоглосон цор ганц улиралдаа 2003 оны NCAA-ийн аварга болж хамгийн үнэ цэнтэй тоглогчоор нэрлэгдсэн. Улмаар түүнийг 2003 онд NBA-ийн драфтын нэгдүгээр тойргийн гуравдугаар сонголтоор Денвер Наггетс баг сонгож өөрсдийн эгнээндээ нэгтгэсэн. NCAA-ийн хамгийн шилдэг тоглогч яагаад драфтын гуравдугаар байраар сонгогдсон талаар тайлбар хүргэхэд түүний өмнө бүх цаг үеийн хамгийн шилдэг тоглогчдын нэг болох Леброн Жеймс их сургуульд тоглолгүй шууд ахлах сургуулиасаа нэгдүгээр байраар, Дарко Милич гэх тоглогч Европын лигээс хоёрдугаар байраар тус тус сонгогдож байв.
БАРИМТ 6
Кармело Энтони 2003 оны 11-дүгээр сарын 7-ны өдөр Лос Анжелес Клипперс багийн эсрэг 30 оноо авснаар тухайн үедээ Коби Брайантын араас орох хамгийн залуудаа 30 оноо авсан тоглогчоор нэрлэгдсэн. Уг тоглолт нь түүний NBA дэх зургаа дахь тоглолт байжээ.
БАРИМТ 7
Кармело Энтони 2 метр 1 см өндөртэй бөгөөд хүчний довтлогчийн байрлалд замналынхаа турш тоглосон. Денвер Наггетс багт тоглож байх хугацаандаа Кармело Энтони 2004-2010 оны турш тасралтгүй Плей-Оффд шалгарч байсан ч бүсийн финалаас цааш шатанд шалгарч байсан удаагүй.
БАРИМТ 8
Улмаар лигийн хамгийн шилдэг оноо авагчдын нэг болоод байсан Кармело Энтони 2011 онд Нью Йорк Никс баг руу солигдож өөрийн замналын шинэ хуудсаа нээсэн. Денвер Наггетс багийн төлөө 15 дугаартай тоглодог байсан тэрбээр шинэ багтаа 7 дугаарын өмсгөлтэй тоглохоор шийдсэн. Учир нь түүний хуучин 15 дугаарыг Нью Йорк Никс баг аль хэдийн мөнхөлсөн байв. Мөн түүний хувьд замналынхаа төгсгөл үед Портланд Трейл Блаззерс багийн төлөө 00 дугаартай тоглосон.
БАРИМТ 9
Кармело Энтони нь АНУ-ын шигшээ багийн хамт Олимпын наадамд 2004-2016 онуудын хооронд нийт дөрвөн удаа оролцож гурван алт, нэг хүрэл медаль хүртсэн. Мөн түүнд 2006 оны Япон улсад зохион байгуулагдсан ДАШ-ий хүрэл медаль бий.
БАРИМТ 10
Кармело Энтони NBA-ийн замналынхаа турш Денвер Наггетс, Нью Йорк Никс, Оклахома Сити Тандер, Хьюстэн Рокетс, Портланд Трейл Блаззерс, Лос Анжелес Лейкерс гэх зургаан багийн төлөө 2003-2022 оны турш нийт 19 улирал тасралтгүй тоглож 22.5 оноо, 6.2 самбараас бөмбөг авалт, 2.7 дамжуулалт дунджилсан.
БАРИМТ 11
Кармело Энтони бол бүх оддын тоглолтод 2007 оноос эхлэн нийт 10 удаа, Бүх NBA-ийн хоёрдугаар багт хоёр удаа, NBA-гийн онооны аваргаар нэг удаа (2013), NBA-гийн 75 жилийн ойд зориулан зарласан бүх цаг үеийн хамгийн шилдэг 75 тоглогчийн эгнээнд тус тус нэрлэгдэж байсан эрхэм юм.
БАРИМТ 12
Тэрбээр хүүхэд насандаа бейсболын спортод хамгийн ихээр дуртай байсан ба уг спортын мэргэжлийн тамирчин болохыг мөрөөддөг байжээ. Харин түүний чөлөөт цагаараа хийх дуртай зүйлсийн жагсаалтыг загасанд явах, хөгжим сонсох, кино болон телевизийн цуврал үзэх зэрэг тэргүүлдэг байна.
БАРИМТ 13
Түүний амралтаа өнгөрөөх хамгийн дуртай газар бол Итали улс. Мөн тэрбээр Италийн үндэсний хоол болох пастаг хатуухан дарстай хамт хослуулан хэрэглэх тун ихээр дуртай гэнэ.
БАРИМТ 14
Кармело Энтони нь дарсанд дурлагч нэгэн бөгөөд “What’s In Your Glass?” буюу орчуулбал “Таны хундаганд юу байна вэ?” гэх нэртэй дарсны тухай подкастыг хөтлөн явуулдаг. Тэрбээр бүх төрлийн дарсыг тун ихээр таашаадаг хэдий ч Франц дарсыг онцгойлон хэрэглэх дуртай.
БАРИМТ 15
Хэрвээ сагсанбөмбөгийн тамирчин болоогүй байсан бол Кармело Энтони өөрийгөө продюсер болох байсан “Би одоо ч продюсер болохыг хүсэж байна” хэмээн ярьдаг. Учир нь хүн бүрийн үзэл санаа, урам зориг болон бүтээлч санаанд нь өөрийн уран бүтээлээрээ дамжуулан гэрэл гэгээ оруулахыг хүсдэг ажээ.
БАРИМТ 16
Кармело Энтони NBA-ийн замналынхаа турш нийт дөрвөн тоглолтод 50+ оноо авсан ба түүний дээд амжилт нь 62 оноо юм. Тодруулбал, тэрбээр 2014 оны нэгдүгээр сарын 24-нд Нью Йорк Никс багийн өмсгөлтэйгөөр Чарлотт Бобкэтс буюу одоогийн Чарлотт Хорнетс багийн эсрэг 62 оноо авч байсан юм. Мөн уг 62 оноог авснаар Кармело Энтони нь Медисон Скүэр Гарденд хамгийн өндөр авсан тоглогчоор бүртгэгдсэн.
БАРИМТ 17
Нийт 16 улирлын турш нэг тоглолтод дор хаяж 21 оноо дунджилсан түүнийг “Тогтмол шилдэг тоглолтыг хаан” хэмээн хочилдог. Мөн тэрбээр NBA-д өнгөрүүлсэн 19 жилийн улирлынхаа турш нийт 28,289 оноо авч бүх цаг үеийн жагсаалтын есдүгээр байранд бичигддэг.
БАРИМТ 18
Кармело Энтони рүүки улирлаасаа эхлэн олон төрлийн сан, сайн дурын үйл ажиллагаануудад хандив өргөсөөр ирсэн ба сайн үйлсийн аянуудад тогтмол оролцдог. Энэ нь мөн л түүний хүн бүрд тэгш эрхийг олгохыг хүсдэг зорилгыг нь илтгэдэг.
БАРИМТ 19
Түүний оноо авах онцгой чадвараас гадна, ямар ч нөхцөл байдалд бууж өгөлгүй өөрийн багаа ялалтад хөтлөхийг хэн бүхнээс илүү ихээр хүсдэг хүчирхэг сэтгэл зүй нь Кармело Энтониг бусад тоглогчдоос онцгойруулдаг.
БАРИМТ 20
Ирээдүйд “Алдрын Тэнхим”-ийн гишүүнээр нэрлэгдэх 99%-ийн магадлалтай хэмээн статистикаар үнэлэгддэг Кармело Энтони 19 жилийн турш NBA-д тоглох явцдаа лигт түрүүлж, аваргын бөгжийг зүүж үзээгүй гэх сөрөг баримт түүнийг үргэлж дагадаг.
БАРИМТ 21
2003 оны хүчирхэг драфтын ангиас сүүлээсээ хоёрт зодог тайлж буй түүний сагсанбөмбөгийн хувд хамгийн дотнын нөхдүүд нь нэг драфтын ангийнхан болох Леброн Жеймс болон Дуэйн Уэйд нар юм.
БАРИМТ 22
Хувийн амьдралын хувьд Кармело Энтони, Ла Ла Энтони хэмээх Америкийн телевизийн жүжигчинтэй 2004 оны зул сарын баярын өдрөөр сүй тавьж, 2010 онд гэрлэсэн. Тэд Киян Кармело Энтони гэх хүүтэй ба хосууд 2017 оноос хойш тусдаа амьдарч, 2021 онд салах өргөдлөө шүүхэд хүргүүлсэн.
БАРИМТ 23
Кармело Энтони нь замналынхаа эхлэл болон дунд үед марихуан тээвэрлэсэн, согтуугаар замын хөдөлгөөнд оролцсон, замын хөдөлгөөний дүрэм зөрчсөн гэх мэтээр хэд хэдэн удаа цагдаад баривчлагдаж олон нийтийн шүүмжлэлд хатуухан өртөж байсан.
БАРИМТ 24
Тэрбээр томоохон тоглолтуудын өмнө төвлөрөхийн тулд Франк Синатра, Майлс Дэвис нарын дууг болон сонгодог жазз хөгжим сонсдог байсан.
