Монгол Улсын Ерөнхийлөгч Ц.Элбэгдорж тэргүүтэй төлөөлөгчид БНАЛАУ-ын нийслэл Вьентьян хотноо 11 дүгээр сарын 5-6-ны өдрүүдэд зохиогдох Ази, Европын уулзалт буюу АСЕМ-ын дээд түвшний есдүгээр уулзалтад оролцоно.

Дээд түвшний уулзалтын үеэр гишүүн улсууд бүс нутаг, олон улсын хамтын ажиллагааны өргөн хүрээтэй асуудлыг хөндөж, “Эдийн засаг, санхүүгийн асуудлууд”, “Дэлхий дахиныг хамарсан асуудлууд”, “Нийгэм, соёлын хамтын ажиллагаа”, “Бүс нутгийн асуудлууд”, “АСЕМ-ын цаашдын хөгжлийн чиг хандлага” зэрэг сэдэвчилсэн хэлэлцүүлэг өрнүүлэх юм. Уулзалтад 30 гаруй улсын төр, засгийн тэргүүн, АСЕАН-ы Ерөнхий нарийн бичгийн дарга, Европын Холбооны зөвлөлийн дарга, Европын комиссын Ерөнхийлөгч нар оролцоно. 2010 онд тус байгууллагад гишүүнээр элссэн ОХУ, Австрали Улс анх удаа оролцож байгаагаараа онцлог болж байна.

АСЕМ нь Ази, Европын бүс нутгийн хамтын ажиллагааг бэхжүүлж, тулгарч буй сорилтыг хамтдаа даван туулах, хамтын шийдвэр гаргадаг олон талт яриа хэлцээ юм. Европын Холбооны гишүүн 27 улс, АСЕАН-ны гишүүн 10 орон, Австрали, БНСУ, БНХАУ, Монгол, ОХУ, Пакистан, Шинэ Зеланд, Энэтхэг, Япон болон Европын комисс, АСЕАН-ы Нарийн бичгийн даргын газар АСЕМ-ын гишүүнээр ажилладаг.

Манай улс Хельсинки хотноо 2006 онд болсон АСЕМ-ын дээд түвшний 6 дугаар уулзалтаар гишүүнээр элссэн бөгөөд эл уулзалтын хүрээнд зохион байгуулагдсан уулзалт, хуралд тогтмол оролцсоор ирлээ. Түүнчлэн, Монгол Улс 2011 онд АСЕМ-ын орнуудын Шилжилт хөдөлгөөн, суурьшилтын асуудлаарх цагаачлалын албадын удирдлагын хурал, энэ оны 5 дугаар сард АСЕМ-ын Байгаль орчны сайд нарын 4 дүгээр уулзалтыг эх орондоо зохион байгуулсан юм.