Анх 2016 оны Бразилын олимпоос эхлэн ОХУ үндэсний далбаагаа мандуулах эрхгүй болсон. Тодруулбал, допингийн асуудлаас болж 2016 оноос хойш болсон өвөл болон зуны олимпод Орос тамирчид төрийн далбааныхаа оронд Олимпын хорооныхоо далбааг мандуулж ирсэн билээ. 

Тэгвэл ирэх Францад болох олимпын наадамд ОХУ-ын далбаа эзлэх байр суурьгүй гэж тус улсын ерөнхийлөгч Эммануэль Макрон хэлсэн байна. Тэрбээр “L’Equipe” сонинд өгсөн ярилцлагадаа “ОХУ-ын хувьд гэвэл дайны гэмт хэрэг үйлдэн, хүүхдүүдийг хүчээр нүүлгэн шилжүүлсэн тул тэдний далбаа олимпод мандах байр суурь үгүй. Парисын олимпод ОХУ-ын далбааг мандуулахгүй гэдэг дээр хүн болгон санал нийлэх байх” гэж хэлжээ.

Түүнчлэн Франц улс ОХУ-ын тамирчдыг 2024 оны зуны олимпод оролцуулахгүй байх эрхтэй. ОХУ Украин руу цэргээ оруулж, дайн эхлүүлсэн цагаас хойш Европын орнууд олон улсын тэмцээнд Орос тамирчдыг оролцуулахаас татгалздаг болсон. Гэхдээ Орос тамирчдыг оролцуулах тал дээр Макрон “Энэ асуудлыг улс төржүүлж болохгүй” хэмээсэн юм. Магадгүй энэ үг нь ОХУ-ын тамирчдын 2024 оны олимпын наадамд Олимпын хорооны туган дор оруулна гэж таамаглахад хүргэж байна.

Л.Сайнаа