Ливи улсын албаныхны мэдээлснээр "Даниел" нэрт шуурга тус улсын зүүн хэсэгт хүчтэй аадар бороо, үер авчирсны улмаас олон мянган хүн амь үрэгдсэн байна.
Тодруулбал, орон нутгийн зүүн хэсэгт байрлах Ливийн үндэсний армийн (LNA) хэвлэлийн төлөөлөгч Ахмед Мисмари даваа гарагт хийсэн хэвлэлийн бага хурал дээр зөвхөн хамгийн их гамшигт нэрвэгдсэн Дерна хотод л гэхэд 2,000 гаруй хүн нас барж, 5,000-6,000 хүн сураггүй алга болсон гэж мэдэгдэв. Одоогоор амиа алдагсдын тоог шалгах боломжгүй байгаа. Мэдээлсэн уг тоо зөвхөн нэг хотын өгсөн мэдээлэл ажээ.
Бенгази дахь Улаан хавирган сар нийгэмлэг өмнө нь Дерна хотод 150-250 хүн амиа алдсан гэж Ройтерс агентлаг мэдээлээд байлаа. Гэвч Дерна хотод орсон аадар борооны улмаас далан нурж, байшин барилга, зам эвдэрсэн тул энэ тоо үүнээс ч их байх хандлагатай байна.
Мисмари хэвлэлийн бага хурал дээр хэлэхдээ, үерийн шалтгаан нь хотын өмнөд хэсэгт байх хоёр далан нурснаас үүдэлтэй. Үүний үр дүнд гурван гүүр эвдэрсэн. Урсгал ус нь бүхэл бүтэн хорооллуудыг урсгаж, эцэст нь далайд цутгасан" гэв.
Ливийн зүүн нутгийн парламентын дэмжлэгтэй засгийн газрын тэргүүн Осама Хамад энэ байдлыг "урьд өмнө үзэгдээгүй" гэж тодорхойлсныг Ливийн мэдээллийн агентлаг (LANA) онцлов. Олон нийтийн сүлжээгээр цацагдсан бичлэгт живсэн машинууд, нурсан барилга байгууламжууд болон гудамжаар урсаж буй усны урсгалыг харуулсан байна. Үерт өртсөн бүс нутагт цахилгаан тасарч, цэвэр усны хомсдол үүсээд байна.
Л.Сайнаа
