БАРИМТ 1
Д.Отгонжаргал 2001 оны аравдугаар сарын 2-ны өдөр Улаанбаатар хотод мэндэлжээ.
БАРИМТ 2
Түүний аавыг А.Ганбаатар, ээжийг нь Д.Долгоржав гэдэг.
БАРИМТ 3
Тэр эцэг эхээс долуулаа, гурван эгч, нэг ах, хоёр дүүтэй.
БАРИМТ 4
Д.Отгонжаргал 2020 онд “Сэтгэмж” цогцолбор сургуулийг төгсч, “Идэр” дээд сургуулийг аялал жуулчлалын мэргэжлээр суралцжээ.
БАРИМТ 5
Түүний анхны багш нь Б.Оюунсүрэн юм.
БАРИМТ 6
Харин 12 настайгаасаа одоог хүртэл гавьяат дасгалжуулагч Т.Сүхбаатарын удирдлага дор “Женко” клубт чөлөөт бөхийн бэлтгэл сургуулилтаа хийж байна.
БАРИМТ 7
Д.Отгонжаргалын анхны медаль бол 2016 оны өсвөрийн УАШТ-ий хүрэл медаль юм.
БАРИМТ 8
Тухайн жил Саори Ёшидагийн нэрэмжит олон улсын тэмцээнд түрүүлж, “Асашёорюү кап” тэмцээнээс алтан медаль хүртжээ.
БАРИМТ 9
Харин 2017 оны өсвөрийн УАШТ-д медалийн өнгөө хувиргаж, мөнгөн медальтан болсон.
БАРИМТ 10
Тэр жил Монгол туургатан хүүхдийн наадамд түрүүлж, Саори Ёшидагийн нэрэмжит тэмцээнээс хүрэл медаль хүртсэн байна.
БАРИМТ 11
2018 онд өсвөрийн УАШТ-д дахин түрүүлж, хошой аварга болов.
БАРИМТ 12
Тухайн жил залуучуудын УАШТ-ээс мөнгө, Ч.Дамдиншаравын нэрэмжит олон улсын тэмцээнд түрүүлж, Өсвөрийн Азийн АШТ-ий хүрэл медаль хүртлээ.
БАРИМТ 13
2018 онд өсвөрийн ДАШТ-ий мөнгөн медаль хүртсэн бөгөөд шигшээ барилдаанд Японы бөхөд дийлдсэн байна.
БАРИМТ 14
2019 онд насанд хүрэгчдийн ангилалд шилжиж, УАШТ-ээс хүрэл медаль хүрсэн бөгөөд УАШТ-ээс өсвөр, залуучууд, насанд хүрэгчид гэсэн гурван насны ангилалд медаль хүртсэн түүний амжилт ирээдүйтэй бөх болохыг илтгэж байв.
БАРИМТ 15
Дараа жилийн насанд хүрэгчдийн УАШТ-ээс дахин хүрэл медаль хүртэж, Залуучуудын УАШТ-ээс хоёр дахь мөнгөн медалиа зүүлээ.
БАРИМТ 16
2021 онд Норвегийн Осло хотод болсон чөлөөт бөхийн насанд хүрэгчдийн ДАШТ-ий 50 кг-ын жинд хүрэл медаль хүртлээ.
БАРИМТ 17
Дэлхийн медальтан болж ирээд Монгол Улсын залуучуудын УАШТ-д түрүүлсэн юм.
БАРИМТ 18
2022 онд домогт бөх Иван Ярыгиний нэрэмжит “Алтан гранпри” тэмцээнээс хүрэл, Яар Догугийн тэмцээнээс хүрэл медаль хүртжээ.
БАРИМТ 19
Тухайн жилийн насанд хүрэгчдийн УАШТ-ээс алтан медаль хүртэж, Алматыгийн “Ranking Series” тэмцээний хүрэл медальтан болов.
БАРИМТ 20
2022 онд Сербийн нийслэл Белград хотод болсон чөлөөт бөхийн насанд хүрэгчдийн ДАШТ-ий 50 кг-ын жинд мөнгөн медаль хүртсэн бөгөөд шигшээ барилдаанд Японы алдарт бөх Юи Сүсакид ялагдсан юм.
БАРИМТ 21
Д.Отгонжаргал өдгөө Серби улсын Белград хотноо болж буй насанд хүрэгчдийн ДАШТ-ий 50 кг-ын жинд мөнгөн медалийн болзол хангаж, өнөөдөр алтан медалийн төлөө дахин хүч үзэхээр шалгарлаа.
БАРИМТ 22
Түүний шигшээ барилдаанд хүч үзэх бөх Японы Юи Сүсаки. Тэд дэлхийн дэвжээнд түрүү булаалдахаар хоёронтоо таарч байна.
БАРИМТ 23
Д.Отгонжаргал насанд хүрэгчдийн дэлхийн аварга шалгаруулах тэмцээнээс гурван жил дараалан медаль хүртсэн Монголын анхны бөх болов.
БАРИМТ 24
Тэр хэрэв өнөөдөр ялбал ДАШТ-ий иж бүрдэл медальтай болох ба “Парис-2024” зуны олимпын наадамд оролцох эрх авсан Монголын хоёр дахь, чөлөөт бөхийн анхны тамирчин болж байна.
Сэтгэгдэл (7)