МУГЖ, дуучин Т.Баясгалангийн албаны хувцастай зураг цахим сүлжээнд УИХ-ын сонгуульд нэр дэвших нь гэсэн таамаглалыг дагуулсан. Энэ талаар тэрбээр өөрийн цахим хуудсаар дамжуулан тайлбар хийжээ. 

Үүнд, "Хүчирхэг луу жилд Олон Улсын хэмжээний хэд хэдэн чухал төсөл-арга хэмжээг эхлүүлээд байгаагаа, сарын эхэнд Та бүхэндээ дуулгасан билээ. Баясаа нь урлаг-соёл, боловсрол, бүтээн байгуулалтын салбарт 20 гаруй жил ажиллаж байгаа тул албан хувцастай зураг хөрөг авахуулах хэрэгцээ бишгүй бий шүү дээ. Гэтэл өнгөрсөн хэд хоногт нэг 2 зурагнаас болж, олны дунд нэлээд хэлэлцүүлэг болжээ.

Жил жилийн сонгууль дөхөхөөр л зургийг минь “яриулаад”, нэр дэвших нь гэх юм. Анзаарахад, маш олон хүн дэмжсэн байсанд чин сэтгэлийн ТАЛАРХАЛ ИЛЭРХИЙЛЬЕ.

Харин цөөн хүмүүс хэлбэр дүрсээр хийрхэж, өнгө зүсээр өөнтөглөж, огт мэдэхгүй зүйлээ баттай мэт гайхамшигтай сайхан ярьцгаасан байсан. Сандарч мэгдсэн Та бүхэн минь тайван амгалан байцгаагаарай. Аливаа ажлын шаардлага болон гадна дотны уулзалтууддаа зориулсан, албан хувцастай зураг цаашид ч их орох байх шүү.

Өнгөрсөн хугацаанд 10,000 айлын тулганд гал асааж, эмнэлэг, цэцэрлэг-сургууль барьж байгуулан, гурван жил Нийслэл-дүүргийн шилдэг татвар төлөгчөөр шалгарсан хамт олныг удирдан авч явдаг тул Монгол Улсдаа хөгжил дэвшил авчрах олон ажлуудаа хийж гүйцэтгэхийн төлөө өөрийн мэдэх салбартаа хүссэн ч эс хүссэн ч сэтгэл зүрхээ зориулах болно" гэсэн байна.