Энэ оны жүдо бөхийн ДАШТ ирэх тавдугаар сарын 19-23-ны өдрүүдэд АНЭУ-ын Абу Даби хотноо зохион байгуулагдана. Тэмцээнд таван тивийн 109 орны 675 шилдэг жүдоч хурд хүч, авхаалж самбаагаа сорино. Тус тэмцээнд манай улсаас 13 жинд 18 жүдоч хүч үзэх гэж байгаагийн ес нь эрэгтэй, ес нь эмэгтэй байна. Манай редакцийн зүгээс ДАШТ-ийг угтан монгол жүдочидоо цувралаар танилцуулж байгаа билээ. Энэ удаад эрэгтэйчүүдийн -66 кг-ын жинд барилдах ДАШТ-ий ХОШОЙ хүрэл медальт, ОУХМ Ё.Басхүү, ОУХМ Б.Эрхэмбаяр нарыг онцолж байна.

Тэдний жинд Бразилын Лима Виллиан, Молдавын Виерү Дэнис, Азербайжаны Нажафов Яшар тэргүүтэй шилдгүүд жагсаж байна. 

Ё.Басхүү гэж хэн бэ?

Ё.Басхүү нь 1993 оны аравдугаар сарын 1-ны өдөр Завхан аймгийн Нөмрөг суманд төрсөн. Жүдо бөхийн эх орон Япон улсад болсон ДАШТ-д анх удаа оролцохдоо шагналт байрт шалгарч байжээ. Энэ тэмцээнээс харамсал болон ухаарлыг олж авсан тэрбээр хоёр жилийн дараа “Булган сүүлтэй Будапешт”-ийн дэвжээнд дэлхийн медальтан болж харамсалаа тайлав.

Үүнээс хэдхэн сарын өмнө Токиогийн олимпын наадамд Японы алдарт бөх Хифүми Абэд вазари үнэлгээгээр ялагдсан, гэхдээ түүний бэртэл сайн эдгээгүй байсан гэдэг. Тэрбээр ялагдсаныхаа дараа “Хифүми Абэтэй хоёрдугаарт таарахдаа төлөвлөсөн барилдаанаа хийж чадаагүй. Үндсэн цагт оноо алдахгүй байгаад нэмэлт цагт явъя гэсэн бодолтой гарсан маань буруудсан ч байж магадгүй. Эхнээсээ л явдгаараа яваад барилдсан бол яах ч байсан юм билээ. Абэ аваргатай өмнө нь 2018 оны Осакагийн Гранд Слам, 2019 оны дэлхийн аваргад таарч хожигдож байсан. Хоёр хожигдлоо, хожлоо тайлъя гэж бодсон ч чадаагүй” хэмээн ярьсан.

Тэр тив, дэлхийн медальтай ч улсдаа түрүүлсэн түүх түүнд үгүй. УАШТ-д дөрвөн удаа оролцохдоо 2018, 2019 онуудад хүрэл медаль хүртжээ. Сонин шүү.

Ер нь 66 кг-ын жинд монголчууд түлхүү сайн барилддаг. Алдарт бөх Х.Цагаанбаатар, Д.Төмөрхүлэг, Д.Алтансүх нарыг нэрлэж болно. Тэдний амжилтыг залгамжлах бөх бол гарцаа байхгүй Ё.Басхүү юм. Тэр дэлхийн бөх болсон, олимпын наадмаас медаль авах монгол тамирчдын тоонд зүй ёсоор нэрлэгдэнэ. Түүний жүдогийн анхны багш нь нутгийн ах, аймгийн заан Г.Батцэрэн бол Улаанбаатарт ирээд Ц.Шийрэв багшид шавь оржээ.

Тэрбээр жүдо барилдахаас гадна үндэсний бөхөөр чамгүй үздэг, М.Баяржавхлан гардитай ч хамаатан гэх. Завхан аймагтаа дөрвөн сумын нэгдсэн барилдаанд түрүүлж байсан удаатай. Өнгөрсөн жил Улсын баяр наадмаар залуу заан Н.Жаргалбаярт өвдөг шорооджээ.

Тэр одоогоор дэлхийн чансааны 4386 оноотойгоор тавдугаар байрт бичигдэж буй.

Тэрбээр 2021, 2023 оны ДАШТ-ээс хүрэл медаль хүртсэн. Мөн 2022 оны Парис, 2023 оны Улаанбаатар Их дуулга тэмцээний алтан медальтай. Түүнчлэн Их дуулгаас гурван мөнгө, долоон хүрэл, Гранд пригаас нэг алт, хоёр хүрэлтэй шилдэг жүдоч юм. Ингээд дуусаагүй ээ. Тэрбээр ААШТ-ээс алт, хүрэл, Азийн наадмаас мөнгө, хүрэл медальтай. Энэ жил Монголчууд түүнээс олимп, дэлхийн медаль л харж байна. 

Б.Эрхэмбаяр гэж хэн бэ? 

Энэ жинд чимээгүй хөдөлмөрлөсөөр тодроод байгаа өөр нэг эрхэм бол Б.Эрхэмбаяр мастер. "Алдар" спорт хорооны тамирчин 2023 оны насанд хүрэгчдийн УАШТ-ий аварга ОУХМ Б.Эрхэмбаяр нь Тэрбээр 1995 оны есдүгээр сарын 03-нд төрсөн. Өдгөө 28 настай

Баттогтохын Эрхэмбаяр 2022 онд Улаанбаатар хотноо болсон "Их дуулга"-аас алт, 2018 онд Дюссельдорф хотноо болсон "Их дуулга"-аас хүрэл медаль хүртэж, 2019 онд Ухань хотод болсон Дэлхийн цэргийн наадмаас хүрэл медаль хүртэж, алтан медаль хүртсэн.

Тэр дэлхийн чансааны 4430 оноотойгоор дөрөвдүгээрт бичигдэж байна.

Л.Сайнаа