БАРИМТ 1
М.Анхцэцэг 1997 оны арванхоёрдугаар сарын 25-ны өдөр Улаанбаатар хотод айлын ууган охин болон мэндэлжээ.
БАРИМТ 2
Тэрбээр 10 настайдаа хүндийн өргөлтийн спортоор хичээллэж байхад эцэг, эх нь дургүй байсан гэдэг. Гэсэн ч тэр нууцаар бэлтгэл сургуулилт хийдэг байв.
БАРИМТ 3
М.Анхцэцэгийг 2009 онд Ерөнхийлөгчийн нэрэмжит тэмцээнээс анхны амжилт (хүрэл медаль)–аа үзүүлэхэд нь зөвшөөрсөн байна. Тэр үед М.Анхцэцэг дөнгөж 12 настай байжээ.
БАРИМТ 4
Тэр 2010 онд спортын мастер, 2011 онд 14 настайдаа олон улсын мастер цол хүртэж байлаа.
БАРИМТ 5
2014 оны өсвөр үеийнхний Азийн АШТ-ээс мөнгөн медаль хүртэхэд спорт сонирхогчид түүнийг “ирээдүйн мундаг тамирчин болно” хэмээн итгэл тавин харах болсон. Тэр олны итгэлийг алдаагүй.
БАРИМТ 6
Тэр жилийн Залуучуудын Азийн АШТ, 2015 оны Дэлхийн цомоос хүрэл медаль хүртсэн.
БАРИМТ 7
Тэрбээр 2016 оны Залуучуудын ДАШТ-ээс алтан медаль хүртэж, дэлхийд танигдаж байлаа.
БАРИМТ 8
2016 онд “Рио-2016” зуны олимпын наадамд амжилттай оролцож, шилдэг найман тамирчны нэг болсон юм. М.Анхцэцэг тэр үед ердөө 19 настай байлаа.
БАРИМТ 9
2016 он түүнд аз авчирсан жил байв. Оюутны ДАШТ-ээс алтан медаль хүртсэн юм.
БАРИМТ 10
Харин 2017 онд Азийн танхимын болон тулааны спортын наадамд торохгүй түрүүлж, насанд хүрэгчдийн ДАШТ-ээс хүрэл медаль хүртсэнээр Монголын хүндийн өргөлтийн ирээдүй болов.
БАРИМТ 11
Түүнд анхдагч олон амжилт бий. 2019 оны насанд хүрэгчдийн Азийн АШТ-ээс мөнгө, насанд хүрэгчдийн ДАШТ-ээс хүрэл медаль хүртсэн. Ингэснээр тэр ДАШТ-ий хошой медальтан болсон цор ганц тамирчин болов.
БАРИМТ 12
Түүнд туйвангийн бэлтгэл сургуулилт заасан анхны багш нь гавьяат дасгалжуулагч Ц.Хосбаяр. Тэр багш дээрээ анх бэлтгэл хийсэн цагаас хүндийн өргөлтийн спортын төлөө хоёргүй сэтгэлээр зүтгэж, өдгөө есөн жилийг үджээ.
БАРИМТ 13
Түүний эцэг, эх нь армийн хүмүүс. Тэр өөрөө ч “Алдар” спорт хороонд харьяалагдаж, бэлтгэл сургуулилтаа хангаж, тэмцээн уралдаанд оролцож байна.
БАРИМТ 14
М.Анхцэцэгт Казахстан, Узбекистан, БНСУ, АНУ-аас эх орныхоо нэрийн өмнөөс тэмцээнд оролцох таатай нөхцөл санал болгосон ч тэр хүлээж аваагүй юм.
БАРИМТ 15
Түүнээс яагаад гадныхны саналыг аваагүй юм хэмээн асуухад “Би мөнгөний төлөө штанг өргөдөггүй, эх орныхоо төлөө өргөдөг. Монгол Улсын төрийн дууллыг эгшиглүүлэх нь миний зорилго” хэмээн хэлсэн удаатай. Тэр их мөнгөний өмнө сөхрөөгүй.
БАРИМТ 16
Тэр өдгөө улсынхаа дээд амжилтыг 70 орчим удаа шинэчилсэн нэгэн.
БАРИМТ 17
М.Анхцэцэг Улсын драмын эрдмийн театрын жүжигчин Б.Золжаргалтай гал голомтоо бадрааж, охинтой болсон нь 2018 он.
БАРИМТ 18
Түүний хоёр дүү хүндийн өргөлтийн спортоор хичээллэж буй бөгөөд улсдаа нэртэй тамирчид юм.
БАРИМТ 19
Түүний хамгийн дурсамжтай тэмцээн бол "Ашгабат-2017". Тэр бэртэлтэй хэрнээ тус тэмцээнд шүд зуун оролцож, төрийн дууллаа эгшиглүүлж байв.
БАРИМТ 20
Тэр өдөрт 2-3 бэлтгэл хийж, дунджаар 18-23 тонны ачаалал авдаг.
БАРИМТ 21
Олон улсын хүндийн өргөлтийн холбооноос өнгөрсөн долдугаар сарын 3-ны өдөр түүнд олимпын эрх авсаныг баталгаажуулсан захидал ирүүлж байлаа.
БАРИМТ 22
М.Анхцэцэг Японы нийслэл Токио хотод болсон зуны олимпын наадамд дөрөвдүгээр байрт шалгарсан. Тэрбээр тус тэмцээний дараа хэлсэн үгэндээ “Дараагийн олимпоос алтан медаль авч, та нарыгаа баярлуулна аа” хэмээсэн.
БАРИМТ 23
2019 оны Насанд хүрэгчдийн Азийн АШТ-ээс мөнгөн, ДАШТ-ээс хоёр дахь хүрэл медалиа авсан. Мөн Дэлхийн цомын аварга болсон түүхтэй. ДАШТ-д 2021 онд Ташкент хотноо энэ жинд огцом, түлхэлттэй өргөлтөөр тус бүр мөнгө, нийлбэрээр алт, 2017 онд Анахаймд 75 кг-д, 2019 онд Паттаяд 81 кг-д огцом өргөлтөөр тус бүр хүрэл медаль хүртсэн.
БАРИМТ 24
М.Анхцэцэг Узбекистаны нийслэл Ташкент хотод болсон насанд хүрэгчдийн ДАШТ-д түрүүлж, Монголын хүндийн өргөлтийн спортын анхны дэлхийн аварга болов.
Сэтгэгдэл (2)