Баримт 1
УИХ-ын гишүүн Ж.Сүхбаатар. Тэрбээр 1975 онд Дархан хотод төрсөн. УИХ-д хоёр дахь удаагаа сонгогдсон улстөрч.
Баримт 2
Тэрбээр 1993 онд Дархан хотын 10 жилийн гуравдугаар сургууль, 1997 онд МУИС-ийн хуульч мэргэжлээр дүүргэжээ. Эрх зүйч мэргэжилтэй. Хууль зүйн ухааны магистр зэрэгтэй.
Баримт 3
Түүний аав С.Жамъянхорлоо Өвөрхангай аймгийн Бүрд сумын уугуул. Төв аймгийн Эрдэнэсант суманд өссөн хүн байжээ. Дарханы гүйцэтгэх захиргаанд анх мэргэжилтнээр ажиллаж байгаад Дархандаа нэхий эдлэлийн үйлдвэрт очиж ажилласан. Жудогийн спортын мастер, аймгийн арслан цолтой. Харин ээж нь Архангай аймгийн Цэнхэр сумынх. Дарханы тээврийн удирдах газарт ажиллаж байгаад тэтгэвэрт гарсан нэгэн.
Баримт 4
Ж.Сүхбаатар айлын том. Дөрвөн эрэгтэй дүүтэй.
Баримт 5
Тэрбээр бага насаа шинэ Дарханы хуучин хороололд VI байшин гээд Хараа зочид буудлын хажууд өнгөрүүлжээ. Энэ тухайгаа “Дарханы маань ерөнхий зохион байгуулалт алдагдаагүй байгаа энэ хэв маягт хайртай. Ер нь хүн төрсөн газраасаа нэр дэвшиж ялах сайхан. Эцэг, эхийн нэрийг хичээж явахаас гадна, өөрийн нэрийг хичээх, наад зах нь өөрөө тодрох яахав, болж өгвөл олон ажил хийж амжуулах, төрсөн газраа өнгөтэй өөдтэй байх ёстой шүү гэсэн давхар сэтгэл зүйн асуудал байдаг юм билээ” хэмээжээ.
Баримт 6
Аав нь бөхөөр хичээллэдэг байсан болоод ч тэр үү, Ж.Сүхбаатар багаасаа спортод сонирхолтой нэгэн байжээ. Дархандаа хоёр ч удаа үзүүрлэж, нэг удаагийнхад нь аавтайгаа хамт наадмын талбайд зодоглож, үзүүрлэжээ. Шагналд нь гүрж ногоон цай, цайны халуун сав, 15 төгрөг авахад аав нь бас шагнал авч таарсан гэдэг. Мөн чөлөөт бөх рүү ороод хотын аварга болжээ.
Баримт 7
Ж.Сүхбаатар УИХ дахь Намын Бүлэгт хуулийн зөвлөх, 2001 онд УИХ-аас Сонгуулийн ерөнхий хорооны нарийн бичгийн даргаар томилогдож байжээ.
Баримт 8
Тэрбээр 2008 онд УИХ-ын гишүүнээр сонгогдож, улмаар Төрийн байгуулалтын байнгын хорооны дарга болоход нь нам, засгийн зүгээс түүнд нэгэн үүрэг хүлээлгэсэн нь Сонгуулийн тухай хуулийг боловсронгуй болгох талаар. Улмаар УИХ-аас Сонгуулийн тухай хуулийг шинэчлэн баталж, 2012 оны ээлжит УИХ-ын сонгуулийг анх удаа холимог системээр явуулсан байдаг. Мөн санал тоолох хар машиныг нэвтрүүлсэн билээ.
Баримт 9
УИХ Монгол Улсын Үндсэн хуульд өөрчлөлт оруулснаар гишүүдийн тоог 126 болгож нэмэгдүүлсэн. Эл асуудлыг УИХ-ын гишүүн Ж.Сүхбаатар 2009 оны үед хөндөж байв. Тодруулбал, УИХ гишүүдийн тоог нэмэгдүүлж, 99 болгох ёстой гэх асуудал тавьснаар шүүмжлүүлж явсан юм. Гэхдээ үзэл бодолдоо тууштай зогссон гэж хэлж болно.
Баримт 10
УИХ-аар 2019 онд Монгол Улсын Үндсэн хуульд өөрчлөлт оруулах үед энэ асуудлаар байр сууриа илэрхийлэх үеэрээ "УИХ –д сонгогдох гишүүдийн тоо нэмэгдэх нь одоогийн нэг гишүүний эдэлж байгаа эрх, ямба гуравны нэгээр буурна гэсэн үг. Тооны олон гэж асуудлыг харах гэхээсээ илүүтэй нөгөө талаас нь харах хэрэгтэй. Манайхан идэж уух хүний тоо нэмэгдэх нь гэж ярьдаг. Гэтэл үгүй юм. Энгийнээр тайлбарлавал парламентын гишүүний тоо нэмэгдэх нь гишүүд үгсэн хуйвалдаж шийдвэр гаргах, асуудлыг амархан өөрчлөх боломж нь тэр хэрээр буурна" хэмээн байр сууриа илэрхийлж байв.
Баримт 11
2012 оны сонгуульд МАН ялагдаж, сөрөг хүчний эгнээнд шилжсэний дараа Бага болон Их хурлаа хуралдуулж, Намын удирдлагаа сонгосон байдаг. Энэ үеэр Нарийн бичгийн даргын албатай явсан Ж.Сүхбаатар МАН-ын Ерөнхий нарийн бичгийн сунгаанд Ж.Мөнхбаттай өрсөлдсөн ч олонхийн дэмжлэг аваагүй. Хурлын дараа тэрбээр Ж.Сүхбаатар “МАН Т.Бадамжунай гэх мэт авлигачдаасаа салаагүй цагт цэвэршихгүй” гэсэн хатуухан үгийг дамжуулан мэдэгдэж байв.
Баримт 12
МАН-ынхан сөрөг хүчин болсны дараа чуулганы нэгдсэн хуралдааныг бойкотлож “буйдантай жагсаал” зохион байгуулсан байдаг. Энэ үеэр Намын Нарийн бичгийн даргаар ажиллаж байсан Ж.Сүхбаатар “Ер нь бид чинь нэг тийм дарга, түшмэл стильтэй. Манай нам чинь төр барих школтой, ачаа үүрээд сурчихсан, хариуцлагаас зугтдаггүй нам. Нөгөө нам маань сэлэм л эргүүлдэг, тэгээд засгийн эрхийн төлөө л үздэг, авахын төлөө л ажилладаг байнга сонгуулийн пиар хийдэг нам байсан. Энэ хоёрын чинь хооронд тэмээ ямаа шиг ялгаа бий шүү дээ” хэмээн ярьж байжээ.
Баримт 13
Ж.Сүхбаатарын хувьд МАН-аас гарсныхаа дараа МАХН-ын Ерөнхий нарийн бичгийн даргаар хэсэг хугацаанд ажилласан байдаг. Улмаар түүнийг УИХ-ын дарга Г.Занданшатарын зөвлөхөөр ажиллахаар болсон нь зарим талаараа асуулт дагуулах болсон юм.
Баримт 14
Харин энэ тухайгаа тэрбээр “Миний хувьд МАН-ын доторх МАНАН сүлжээний эсрэг хүч хүрэхгүй болохоор үзлээ дагаад МАХН дахь МАНАН-гийн эсрэг хуучин журмын нөхөдтэйгээ нийлж тэмцсэн. МАН шинэчлэгдэж өөрчлөгдөж гэмээ нь улс төрийн намууд хөгжиж, төр бэхжинэ гэж би үздэг хүн. Ойрын ирээдүйд МАН, МАХН улс төрийн цул хүч болно гэдэгт эргэлздэггүй” хэмээн тайлбарласан удаатай.
Баримт 15
Ийнхүү тэрбээр 2016, 2020 онд УИХ-ын гишүүнээр сонгогдсон. Тухайлбал, 2020 онд 33.8 хувийн саналаар сонгогдож байв.
Баримт 16
Энэ парламентын үед Түгжрэлтэй тэмцэх даалгавар аван, сайдын албанд томилогдсон түшээ бол Ж.Сүхбаатар юм.Хэдийгээр Улаанбаатар хот асуудал хариуцсан сайдтай болсноор автомашины түгжрэл саараагүй ч амь тавих шахам байсан автобуснуудаа шинэчилж эхэлснээр зорчигчид ая тухтай нөхцөлд зорчдог болсон.
Баримт 17
Гэсэн ч түүнийг "ногоон автобус"-ны гэх хэрэгт яллагдагчаар татан шалгаж буй. Энэ талаар тэрбээр "Засгийн газрын сайд болоогүй байх гурван жилийн хугацаанд УИХ-ын гишүүний ажиллаа сайн хийсэн гэж боддог. Үндсэн хуулийн өөрчлөлтөөс эхлээд бүх том асуудлуудад оролцсон. Би том зургаараа харсан бодлогодоо үнэнч байгаа. Сайдаар ажиллаж байхад, ажилланы дараа ч миний ажил бүтэлгүйтээгүй" гэсэн юм.
Баримт 18
Тэрбээр энэ парламентад Төрийн байгуулалтын байнгын хорооны гишүүн, Хууль зүйн байнгын хорооны гишүүнээр ажилласан.
Баримт 19
Энэ дөрвөн жилийн хугацаанд Хүний эрх хамгаалагчийн эрх зүйн байдлын тухай хууль, Шүүхийн тухай хуулийн шинэчилсэн найруулга, Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд гар бие оролцон, ажиллажээ.
Баримт 20
Орос, Англи хэлтэй.
Баримт 21
2022 оны АТГ-т мэдүүлсэг хөрөнгө орлогын мэдүүлэгтээ өөрийн орлого 56 сая хэмээн мэдүүлжээ. Мөн 840 сая төгрөгөөр үнэлэгдэх нийтийн орон сууц нэг, автомашины зогсоолтой.
Баримт 22
Харин 120 сая төгрөгөөр үнэлэгдэх суудлын жижиг машин Mercedes Benz, E300-тэй аж. Мөн 30 сая төгрөгөөр үнэлэгдэх үнэт эдлэлтэй.
Баримт 23
Тэрбээр 2024 оны УИХ-ын сонгуульд нэр дэвшихгүй.
Баримт 24
Энэ талаар УИХ-ын Ж.Сүхбаатар "Улстөрч хүн унаж босох хоёрдугаар асуудал. Харин бодлого хэрэгжүүлсэн эсэх нь нэгдүгээр асуудал юм. Миний тавьсан бодлого зөв байсан. Галтай салбар руу орж олон хүний бах тавыг хангалаа. Нийслэлийн Чингэлтэй дүүргий иргэд надад итгэл хүлээлгэж УИХ-ын гишүүнээр сонгосон" гэсэн юм.
Сэтгэгдэл (1)