Асашёорюү Д.Дагвадоржийг “Би үндэсний бөх сонирхдоггүй, үздэг ч үгүй. Миний нэр төрд ноцтойгоор халдлаа” гэж хэлтэл нь бухимдуулжээ. Өчигдөр их аварга Д.Дагвадоржийг үндэсний бөхийн найраанд нэр холбогдож, сэргээш хэрэглэсэн гэгдээд буй арслан Х.Мөнхбаатартай ам мурийж байсан тухай нийтлэл хэвлэлээр гарсан нь түүний дургүйцлийг нэлээд хүргэжээ. Тэрбээр зодоон цохион хийсэн гээд янз бүрийн ярианд ордог ч тэр болгон “би буруугүй” гэх зэргээр тайлбар хийгээд явдаггүй. Харин энэ удаа өөрийнх нь нэр төрд халдлаа хэмээн шүүхэд өгөхдөө тулаад байна.

    Учир нь түүнийг нэгэн сайт “арслан Х.Мөнхбаатар Японы сумогийн 68 дахь их аварга Д.Дагвадоржтой холбоотой ноцтой асуудлаар маргаан өрнүүлж байсан сураг байдаг. Их аварга Дагвадорж маань улсын заан Ч.Санжаадамбыг эртнээс дэмждэг байсан юм байх. Хэдэн жилийн өмнөхөн Өвөрхангайд болсон даншиг наадамд заан Ч.Санжаадамба арслан Х.Мөнхбаатар нар таарч тунаж үлдсэн юм байна. Тэгтэл сумогийн Их аварга Д.Дагвадорж Х.Мөнхбаатар арсланд найрааны шинжтэй сэжиг бүхий зүйл хэлжээ.
- Х.Мөнхбаатар аа, чи Ч.Санжаадамбад унаад өгчих, тэгвэл өчнөөн сая төгрөгөөр үнэлэгдсэн, эртний хөөргөө бэлэглэе. Чи зөвшөөрчих гэх зүйлийг хэлж Х.Мөнхбаатарын дургүйг нь хүргэчихэж. Монгол хүн байж үндэсний бөхдөө хүндэтгэлгүй хандан ийм үг хэлсэн Их аваргад уурссан Х.Мөнхбаатар арслан Ч.Санжаадамбыг “ёстой л нэг өргөөд шиднэ гэгчээр унагая” гэж унагасан гэдэг” хэмээн бичжээ. Харин Аса аварга ийм яриа огт болоогүй бөгөөд нэр төрд нь халдсан, гүжир гүтгэлэгийн шинжтэй байна гэж твиттер хуудсаараа дамжуулан гомдол нэхэв.

   Тэрбээр найрааны тухайд "Ард түмний хүндэлж хайрладаг үндэсний бөхийг шавар шавхай болгосон зарим нэг нөхдүүдийн хийсэн юм. Тэгээд ч маньд хамаагүй асуудал" гэж твиттерийн жиргээчиддээ гомдлоо хэлэв. Мөн "Бичсэн зүйлээ залруулахыг хүсч байна. Хууль дүрэм байдаг юм бол энэ мэт хүний нэр төрд ноцтойгоор халдсан бол хариуцдаг байгууллагад нь хандана" гэж ширүүхэн мэдэгдлээ.

    Твиттер хуудсанд түүнийг өмөөрсөн олон байсан ч "монгол бөхийг сонирхдоггүй, үздэг ч үгүй. Хаа хамаагүй балиар бөхийн аварга биш" гэж хэлсэнд нь гоморхох бас гайхах нэгэн бас байсан юм. Хэрэв үндэсний бөхийг балиар гэж үздэг бол Улсын заан аав, улсын аварга ахыгаа ч бас үгүйсгэж байгаа хэрэг болж байна. Түүний ах Д.Сумъяабазар бол олонд хүндлэгдсэн аварга. Гэтэл ахыгаа "хаа хамаагүй балиар бөхийн аварга" хэмээн боддог гэж үү?. Хэрэв үндэсний бөхийг ингэж боддог бол өөрөө хаанахын ямар бөхийн аварга вэ гэдгийг ч эргэцүүлж үзэхэд гэмгүй гэж зарим нэг нь бухимдав.

   Ямартаа ч "Монгол тулгатны зуун эрхэм" нэвтрүүлэгт орж "сэтгүүлчид ээ, ичээч" гэж хөтлөгч нь түүнийг өмөөрч байсан ч тун удалгүй дахиад л Д.Дагвадорж аварга хэвлэлийнхэнтэй "байлдах" болоод байна.