Баримт 1
УИХ-д сонгож болохгүй хүнээр нэрлэгдээд буй Түмэндэлгэрийн Батцогт нь Дархан-Уул аймагт төрж өссөн нэгэн. Гэсэн ч тэрбээр Баянзүрхийн Батцогт хэмээн овоглогддог.
Баримт 2
Тэрбээр ажлын гараагаа 2007 онд Нийслэлийн Чөлөөт Ардчилсан Оюутны холбооны Тэргүүнээр эхэлж байв. Дараа нь 2008-2010 онд Ардчилсан Залуучуудын Холбоонд Улс төрийн ажилтан, 2010-2012 онд “И Эм Си Эйч Инженеринг” ХХК-ийн гүйцэтгэх захирал, 2012-2020 онд Баянзүрх дүүргийн Засаг даргын орлогчоор ажилласан нэгэн.
Баримт 3
Түүний сонгуульт ажил 2016 оноос эхэлсэн юм. Тухайлбал, Ардчилсан намын Үндэсний Бодлогын хорооны гишүүнээр сонгогдсон нь сонгуульт ажлынх нь эхлэл байв. Үүний дараа 2011-2018 онд Баянзүрх дүүргийн Ардчилсан намын дэд даргаар сонгогдсон. Мөн 2012-2016 онд Баянзүрх дүүргийн Иргэдийн Төлөөлөгчдийн хурлын Төлөөлөгч, Тэргүүлэгч, 2017-2019 онд Нийслэлийн АН-ын дэд дарга, 2018-2023 онд БЗД-ийн АН-ын даргын үүрэг гүйцэтгэгчээр сонгоджээ. Харин 2016 оноос НИТХ-ын Төлөөлөгч, 2020 оноос Баянзүрх дүүргийн Иргэдийн Төлөөлөгчдийн хурлын Төлөөлөгчөөр сонгогдсон. Энэ жил буюу 2024 оны УИХ-ын сонгуульд наймдугаар тойрогт нэр дэвшиж буй. Ийнхүү түүний сонгуульт ажил үргэлжилсээр л.
Баримт 4
2023 оны арваннэгдүгээр сард болсон Нийслэлийн Ардчилсан намын даргын сонгуульд тэрбээр нэр дэвшиж ялалт байгуулж байв. Тухайлбал, тус сонгуульд Д.Бадарсан, Т.Батцогт, М.Тулгат нар өрсөлдсөн бөгөөд олонхын саналаар Т.Батцогт нийслэлийн АН-ыг удирдахаар болсон байдаг. Тэрбээр тухайн үед дэвшүүлсэн мөрийн хөтөлбөртөө "нийслэлийн Ардчилсан намын гишүүдийн тоог жилийн хугацаанд 40 мянган шинэ хүнээр нэмэгдүүлэх, гадаад харилцааг түшиглэн намын гишүүдээ БНСУ, Япон зэрэг оронд сургалтад хамруулах" зэрэг арга хэмжээг авна гэдгээ мэдэгдсэн юм.
Баримт 5
Өнгөрсөн оны арваннэгдүгээр сард нийслэлийн АН-ын даргаар сонгогдсон Т.Батцогт Баянзүрх дүүргээс УИХ-д нэр дэвших хүсэлтээ намдаа өгсөн нь жирийн гишүүд, дэмжигчдийнхээ дургүйцлийг түрүүлсэн. Нийслэлийн АН-ын даргын хувьд Т.Батцогт УИХ-ын сонгуульд нийслэлийн тойргуудаас өрсөлдсөн намын нөхөддөө дэмжлэг үзүүлэн ажиллах ёстой гол хүн атлаа намынхаа бодлогоос урваж, хувь хүний шуналдаа дийлдэж байгаа нь том улс төр тохирохгүй хүн гэдгээ харуулж буй үйлдэл харуулсан.
Баримт 6
Үнэндээ, ийм увайгүй хүнээр нийслэлийн намаа мануулсан нь АН-ын буруу гэлтэй. Нөгөөтэйгүүр нийслэлийн АН-ын дарга Т.Батцогт нийслэлийн МАН-ын дарга Х.Нямбаатараас айсандаа гарман дээр морио орхиод сүүлээ хавчаад дутаасан ч байж мэднэ.
Баримт 7
Уг нь 2018 онд түүнийг Баянзүрх дүүргийн Ардчилсан намын дарга П.Нүрзэдийн тушаалаар Г.Мянганбаяр, Л.Батдэлгэр, М.Ихцэнгэл нарын хамт Ардчилсан намын гишүүнчлэлээс хасаж байсан. Ардчилсан намаас хөөгдсөний дараа Нийслэлийн Иргэдийн төлөөлөгчдийн хуралд сонгогдон ажилласан.
Баримт 8
Т.Батцогт бол улс төрд Х.Баттулгын "утсан хүүхэлдэй". Түүнийг магадгүй Х.Баттулга УИХ-д нэр дэвшихийг шахсан байх болох талтай. Эсвэл үнэхээр л нийслэлийн АН-ыг удирдаж чадахгүй жулдаж буйгаа өөрөө ухаарсан байж болох. Ямар ч байсан замын дундаас нийслэлийн АН-ыг орхих байсан юм бол анхнаасаа чаддаг, мэддэг хүнд нь зай тавьж өгөх ёстой байсан гэж зарим гишүүд, дэмжигчид нь Т.Батцогтыг буруутгаж сууна.
Баримт 9
Х.Баттулга МоАХ фракцынхаа залуусыг дагуулан Япон улсад айлчлал хийж явсан. Тухайлбал, Х.Баттулгыг дагаж, УИХ-ын гишүүн А.Адъяасүрэн, АН-ын дэд дарга О.Алтангэрэл, Нийслэлийн АН-ын дарга Т.Батцогт, Булган аймгийн Засаг дарга А.Ариун-Эрдэнэ, Орхон аймгийн АН-ын дарга Ц.Батхуяг, Сэлэнгэ аймгийн АН-ын дарга Р.Батжаргал, ҮБХ-ны гишүүн М.Хүдэрбаатар, ҮБХ-ны гишүүн Б.Ган-Очир нар дагалдан явж байсан юм.
Баримт 10
Тэрбээр Баянзүрх дүүргийн Иргэдийн Төлөөлөгчдийн хурлын Төлөөлөгчөөр ажиллах хугацаандаа амаа маш сайн ажиллуулсан гэхэд болно. Цаашилбал, 2024 оны гуравдугаар сард Нийслэлийн ИТХ-ын ээлжит бус XVIII хуралдааны үеэр ширээ цохин томорсон ч удаа бий. Тухайлбал, тус хуралдаанаар Хотын дарга Х.Нямбаатартай утааны асуудлаар маргалдаж "Зүгээр байгаарай Х.Нямбаатар гуай. Би төлөөлөгч байна. Би үгээ хэлж байна" хэмээн ширээгээ цохиж, томорсон.
Баримт 11
Түүнийг Баянзүрх дүүргийн Засаг даргын орлогчоор ажиллаж байх хугацаанд тус дүүргийн газар олголт тэлж, бараг Тэрэлжтэй нийлсэн хэмээн Хотын дарга Х.Нямбаатар мэдэгдэж байсан.
Баримт 12
Түүний Авлигатай тэмцэх газарт мэдүүлсэн хөрөнгө орлогын мэдүүлэгтээ өөрийн орлого 38 сая, гэр бүлийн орлого 7 сая төгрөг хэмээн мэдүүлжээ. Харин 2019 онд мэдүүлсэн хөрөнгө орлогын мэдүүлэгтээ өөрийн орлого 101 сая төгрөг хэмээн мэдүүлсэн байдаг. Өөрөөр хэлбэл, түүний орлого сүүлийн дөрвөн жилд эрс буурчээ.
Баримт 13
Мөн 443 сая төгрөгөөр үнэлэгдэх гурван нийтийн орон сууц, нэг зуслангийн байшинтай аж. 29 сая төгрөгийн үнэ бүхий мал, 18 сая төгрөгөөр үнэлэгдэх газартай хэмээн мэдүүлсэн байна.
Баримт 14
Тэр Baabar.mn-д өгсөн ярилцлагадаа "Дөрвөн жил улс төржиж болохгүй. Дөрвөн жил улсаа хөгжүүлэхийн төлөө л ажиллах ёстой. 45 хоног улс төржиж болно. Тэр нь сонгуулийн өдрүүдэд" хэмээн ярьж байсан. Гэвч тэр үнэн хэрэгтээ хамгийн их улс төржиж, хэрүүл хийж явдаг хүн юм.
Баримт 15
Анх хотод оюутан болж хотод ирээд Баянзүрх дүүрэгт суурьшсан гэдэг. Энэ л дүүрэгтээ хайртай гэж ярьдаг тэрбээр энд амьдралаа босгосон.
Баримт 16
2012-2020 онд Баянзүрх дүүргийн Засаг даргын орлогч хийсэн хүн. Гэвч дүүрэг нь өнгөрсөн онуудад үерт нэрвэгдэж, томоохон осол гарч олон ч хүний амь үгүйрснийг бид санах ёстой.
Баримт 17
Х.Баттулгатай ганзага нийлсэн хүний замнал шоронгийн өрөөнд төгсдөг гэлцэнэ. Түүнийг тийм л ирээдүй хүлээж байж магад.
Баримт 18
Тэр өнгөрсөн оны наймдугаар сард "Нам гэдэг нэг хэсэг бүлэг хүмүүсийн үзэл санааны нэгдэл юм. Манай нам үзэл санаагаа нэгтгээд өөрсдийн гэсэн үнэт зүйлтэйгээр бодлогоо хэрэгжүүлээд явж байна" гэж хэвлэлд ярьсан. Гэвч начир дээрээ нам нь зодоонтой байгаа.
Баримт 19
Түүний гол дайсан нь одоогийн Хотын дарга Х.Нямбаатар байсан. Тийм ч учраас тэр Х.Нямбаатарын санаачилсан юм болгоныг шүлсддэг. Жишээлбэл, такси үйлчилгээг зөвшөөрөлтэй болгох ажлыг эсэргүүцэж мэдэгдэл хийж, "Х.Нямбаатарын батлуулсан урт нэртэй, бантан шиг хуулийн нэг хэсэг нь такси үйлчилгээг зөвшөөрөлтэй болгож, түүгээр амжиргаагаа залгуулагч иргэдийг торгох явдал. Иргэдийн өмчид халдаад зогсохгүй, одоо амжиргааг нь тасалдуулах гэж байна. Бид энэ хуулийг хүчингүй болгохын төлөө ажиллана" гэж байв.
Баримт 20
Тэрбээр энэ оны тавдугаар сард Сүхбаатарын талбайн зүүн талд буюу соёлын төв өргөөний хүзүүвч хэсгийн 2200 мкв газрыг Ардчилсан нам өмчилж байсан газрыг худалдан авсан гэх тухайн үеийн “Улаанбаатар хотын банк" буюу уг газрыг авсан эзэн нь "Сахал" хочит Д.Эрдэнэбилэг хэмээн зарлаж газраа авч сонгуулийн штабаа байгуулна хэмээн жагсаж байв.
Баримт 21
Т.Батцогт НИТХ-ын үеэр өөрийгөө рекламдах, хурган попрох дуртай. Түүний тод жишээ нь НИТХ-ын ээлжит XXII хуралдаанаар “Төв цэнгэлдэх хүрээлэн” ХХК-ийг нийслэлийн өмчид 100 хувь авах шийдвэр гарсан. Энэ үеэр Төв цэнгэлдэхийн газраас үлдсэн 12.6 га газрыг нийслэлийн 1.7 сая иргэнд тэнцүү хувааж өг хэмээн хэлж байв.
Баримт 22
НИТХ-ын ээлжит хуралдааны үеэр Хотын дарга Х.Нямбаатар, Т.Батцогтоо чи тийм сайн байсан юм бол энэ олон жил нийслэлийн иргэдийн төлөөлөгчөөр сонгогдчихоод Төв цэнгэлдэх хүрээлэнгийн бузар булайг дэлгээд өдийд нийслэлийнхээ өмчид аваад ирэхгүй яасан юм. Авчирхаар авчирлаа гэнэ, авчраад чи хулгай хийх гэж байна гэдгийг чинь би ойлгохгүй байна. Буруу ишилсэн сүх шиг байдгаа боль.
Баримт 23
2020 оны 12-р сарын 17-нд Баянзүрх дүүрэгт сонгогдсон Т.Батцогт, М.Тулгат нар хэвлэлд мэдээлэл хийж МАН-ынхан бидэнд төсвийн танилцуулга өгөөгүй, МАН-ынхан ажил хийж чадахгүй байна хэмээн шүүмжилцгээв. Энэ үеэр БЗД-ийн Засаг даргын орлогч Ц.Алтанзагас "Сэтгүүлчид энэ жорлон руу ороод хар. Энэ жорлонд цаас тогтоогч байхгүй. Энэ дүүрэгт 2012-2020 онд Т.Батцогт Засаг даргын орлогчоор ажилласан. Та нарын ажиллаж амьдарч байсан оромж ийм байна. Ийм нөхцөл байдалтай газар бид хүлээж авсан шүү дээ яг үнэндээ” хэмээн хэлж байв.
Баримт 24
Мөн түүнийг Нийслэлийн АН-ын дарга болсоныхоо дараа намын даргынхаа яг эсрэг бодлогыг хэрэгжүүлэн ажиллаж байна гэж гишүүд нь шүүмжилж байв. Тодруулбал тэрээр өөрийг нь өдий зэрэгт хүргэсэн Д.Пүрэвдавааг шахсаар намаасаа зайлуулсан төдийгүй Баянзүрх дүүргийн АН-ыг хоёр хуваасан. Үр дүнд нь Д.Пүрэвдаваа МоЛАН гэх намын дарга болж, АН-ын санал хуваагчийн тоо нэгээр нэмэгдсэн. Нийслэлийн АН-ын дарга гэх албан тушаалд очсон атлаа АН-ын даргынхаа бодлогын эсрэг ажиллаж буй Т.Батцогтын эсрэг намын анхан шатны гишүүд нь идэвхтэй тэмцэл явуулахаа мэдэгдэж байв.
Сэтгэгдэл (10)