Тулгар төрийн 2233, Их Монгол Улс байгуулагдсаны 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадам хоёр хоногийн дараа болох билээ. Баяр наадмын бөхийн барилдаанд уламжлал ёсоор 512 хүчтэн зодоглоно. Бөхийн бүртгэл хэлсэн ёсоороо өнөөдөр оройн 19:00 хаагдаж, улсын цолтой 98, аймаг, цэргийн цолтой 261, сумын цолтой 112, цолгүй 40 гаруй бөх барилдахаар бүртгүүлжээ.

Аварга цолтой таван бөх байна. Сонирхолтой нь идэр залуу аварга Ч.Санжаадамба, С.Мөнхбат нар бүртгүүлсэнгүй. Ч.Санжаадамба аварга 2020 оноос хойш Улсын наадамд зодоглоогүй бол аварга С.Мөнхбат 2009 онд улсын цол хүртсэнээсээ хойш улсын наадмыг анх удаа өнжив.

Баяр наадмын зүүний магнайд өчигдөрхөн Хөдөлмөрийн баатар цолоор энгэрээ мялаасан дархан аварга Г.Өсөхбаяр гарах бол барууны магнайд энэ цаг үед барилдаж буй цор ганц даян аварга Н.Батсуурь, араас нь П.Бүрэнтөгс, Г.Эрхэмбаяр, отгон аварга О.Хангай нар барилдах нь ээ.