Орон нутгийн сонгуультай зэрэгцсэн Баянзүрх дүүргийн дахин санал хураалт МАН-ынхан дунд хүлээлт үүсгээд байна. 19 мянган сонгогчтой энэ тойргийн ирц бүрдээгүй гэсэн урьдчилсан мэдээ байгаа. Өнгөрсөн УИХ-ын сонгуулиар Д.Арвин, Д.Батзориг нарт өгсөн санал аль алиных нь 28 хувьд хүрээгүй тул ийнхүү дахин санал хураах болсон юм. Гэхдээ өчигдөр орой гэхэд Баянзүрхийн сонгогчид хэнд нь илүү санал өгсөн бэ гэдэг тодорхой болжээ. Тодруулбал УИХ-ын гишүүн асан Д.Арвин өрсөлдөгч Д.Батзоригоос илүү санал авсан болохыг намын ажиглагчид нь мэдээлжээ.

   Өмнөх сонгуулиар Д.Арвин өрсөлдөгчөөсөө цөөхөн саналаар илүү явж байсан. Энэ удаад ч бас саналын тооны хувьд хол зөрүү гараагүй байна. Гэхдээ сонгуулийн өмнө “Тус дүүргийн иргэд хэн ч танихгүй хүнд өгч байхаар нүдэнд харагдаж, чихэнд сонсогдоод байдаг Д.Арвиндаа өгье” гэх хандлагатай байсан юм. Олон удаа хойшилсон, тов нь зарлагдахгүй удсан дахин санал хураалтын хооронд Д.Арвин зүгээр суугаагүй. Түүнийг сонгуулийн сурталчилгаагаа хийгээд завгүй байгаа гэх бөгөөд рекламаа “хэтрүүлсэн” тухай яриа ч мэр сэр сонсогдож байсан юм. Монголын хамгийн баян эмэгтэйчүүдийн 9-д ордог, Монголын тэрбумтнуудын 100-д жагсдаг түүнийг мөнгө тараасан гэж хардах нь их байна. Ялангуяа өрсөлдөгчид нь ийм яриа гаргасаар байгаа ч одоогоор батлагдаагүй.

   Харин Д.Арвин илүү санал авч, ялсан ч Баянзүрх дүүргийн сонгогчдын ирц бүрдээгүй тул МАН-ынхан СЕХ-г нүдээ чилтэл харах болоод байна. Учир нь сонгуулийн тухай хуулинд дахин санал хураалт авч байгаа тохиолдолд ирц хүрээгүй гэдэг шалтгаанаар ахиад сонгууль явуулна гэсэн заалт байхгүй аж. Урьд нь ийм асуудал гарч байгаагүй тул хууль тогтоогчид “мартчихсан” бололтой. Тиймээс МАН-ынхан шинэ гишүүнийхээ нэрийг зарлах эсэхээ тэсэн ядан хүлээж байна.

  Хэрэв Сонгуулийн Ерөнхий Хороо үүнийг нааштайгаар шийдэж өгвөл МАН УИХ-д Д.Оюунхорол, Д.Сарангэрэл, Д.Арвин гэсэн гурван эмэгтэй төлөөлөлтэй болох юм.