УИХ-ын чуулганы хуралдаан үргэлжилж байна. Хуралдаанаар Монгол Улсын нэгдсэн төсвийн 2023 оны гүйцэтгэл, Засгийн газрын санхүүгийн нэгтгэсэн тайлан болон “Монгол Улсын 2023 оны төсвийн гүйцэтгэл батлах тухай” Улсын Их Хурлын тогтоолын төсөл /Засгийн газар 2024.08.12-ны өдөр өргөн мэдүүлсэн, хоёр дахь хэлэлцүүлэг/ болж байна. Энэ үеэр УИХ-ын гишүүн О.Батнайрамдал үг хэлж, асуулт асуулаа. 

Тэрбээр "2023 оны санхүүгийн нэгтгэсэн тайлан дээр 137 төрийн өмчит хуулийн этгээд тэр дундаа 109 төрийн байгууллага дээр санхүүгийн санал дүгнэлт гарсан байна. Үүнээс 38 нь санхүүгийн хязгаарлалттай дүгнэлттэй гарсан. Нэг ёсондоо гуравны нэг нь асуудалтай байна.

Боловсролын салбарын төрийн өмчит томоохон сургуулиуд хязгаарлалтад орсон байна. МУИС, МУБИС, ШУТИС, СУИС, ХААИС зэрэг таван сургуульд 50 мянган оюутан суралцдаг.

Эдгээр таван сургуульд нийт оюутны 40 хувь нь суралцдаг. Энэ нь менежментийн асуудал яригдана. Энэ хязгаарлалттай дүгнэлтийг гаргаад өнгөрөх үү, реформ хийх үү. Төрийн тусгай 22 сан байна. Боловсролын зээлийн сан сүүлийн 10 жил хязгаарлалттай, асуудалтай гарч байна. Нийт 120 тэрбум төгрөгийн зөрчилтэй, хөөн хэлэлцэх хугацаа дууссан найдваргүй зээл гэсэн байна. Юу гэсэн үг вэ. Татвар төлөгчдийн мөнгөнөөс олгосон зээлийг цэгцлэх ёстой" гэв.