Цаг агаар хүйтэрч байгаатай холбогдуулан 11 г, д магистралийн 2ф800мм голчтой шугамын талаар Улаанбаатар хотын дарга Х.Нямбаатар дараах мэдээллийг өөрийн цахим хуудсандаа нийтэлжээ. 

Тэрбээр "Нийслэлийн иргэд ээ, 10-р хорооллын оршин суугчид аа. 11 г, д магистралийн 2ф800мм голчтой шугамыг 1983-1984 онд ашиглалтад оруулсан байдаг. 40 жил ашигласан тус шугамын ашиглалтын хугацаа хэдийнэ дууссан учир гэмтэл үүсэх нь цаг хугацааны асуудал болсон. Идэр есийн жавраар 10-р хороолол орчмын төдийгүй нийслэлийн иргэдийг тухгүйтүүлэхгүйн тулд бид тус шугамыг засаж байна. Нийтдээ 3,4 км үргэлжлэх тухайн шугамын 1,6 км трассыг энэ онд өргөтгөнө. Улаанбаатар хотын дулаан хангамжийн 30 хувийг дамжуулдаг тус шугамыг 2ф1000мм голчтой болгож өргөтгөснөөр 6200 гаруй өрхийг төвлөрсөн дулаан хангамжид нэмж холбох техникийн боломж бүрдэх юм.

Бид 2024.09.25 -10.01-ний өдрийн дотор дулаан хангамжийг найдвартай ажиллагаанд залгахаар ажиллаж байна. Та бүхэн минь тэвчээртэй хүлээж байгаад баярлалаа. Ташрамд, Улаанбаатар хотын хэмжээнд нийт 390 гаруй км урттай дулааны шугам сүлжээ байдаг бөгөөд эдгээрийн ихэнх нь 30-60 жилийн насжилттай. Ирэх жилүүдэд засвар шинэчлэлт хийхдээ дулаан хязгаарлахгүй, байнгын ажиллагаатай байлгахаар арга хэмжээ авч ажиллаж байна" гэжээ.