БАРИМТ 1
Казахстан улсын хоёр дахь Ерөнхийлөгч Касым-Жомарт Кемелевич Токаев 1953 оны тавдугаар сард тухайн үеийн Алма-Ата буюу одоогийн Алматы хотод мэндэлжээ. Тэрбээр зохиолч аав, багш ээжийн нөлөөгөөр ном унших ихэд сонирхолтой болон өссөн байна.
БАРИМТ 2
Түүний хувьд казах, орос, франц, англи, хятад хэлээр ярьдаг аж.
БАРИМТ 3
Өдгөө 71 настай тэрбээр 2019 оноос хойш Казахстаны Ерөнхийлөгчийн албан тушаалыг хашиж байгаа юм. Тус улс тусгаар тогтнолоо зарласнаас хойших хоёр дахь Ерөнхийлөгч юм. 2022 онд болсон Ерөнхийлөгчийн сонгуульд Токаев 81.3 хувийн санал авч байжээ.
БАРИМТ 4
Улс төрийн ухааны доктор Токаев олон улсын харилцааны сэдвээр 10 орчим ном бичжээ. Дипломат албаны талаарх анхны эмхэтгэл нь “Даван туулах нь” гэсэн нэртэйгээр 2003 онд хэвлэгдэн гарсан байна.
БАРИМТ 5
Тэрбээр ширээний теннисээр хичээллэдэг агаад спортын дэд мастер цолтой. Улстөрч болсон хойноо Казахстаны ширээний теннисний холбоог 13 жил удирджээ. Мөн тэр алхах дуртай гэнэ.
БАРИМТ 6
Тэрбээр 1975 онд Москвагийн Олон улсын харилцааны дээд сургуулийг төгсөөд Зөвлөлт Холбоот Улсын Гадаад хэргийн яаманд анх ажилд оржээ.
БАРИМТ 7
1985 оноос 1991 он хүртэл буюу ЗХУ задартал Бээжин дэх Зөвлөлтийн Элчин сайдын яаманд ажилласан байна.
БАРИМТ 8
1991 онд Казахстан улс тусгаар тогтнолоо зарласны дараа Токаев Гадаад хэргийн яаманд ажиллаж эхэлжээ. Харин 1994 онд Гадаад хэргийн сайд, 1999 онд Ерөнхий сайд, 2007 онд Парламентын дарга зэрэг өндөр албан тушаалуудыг тус тус хашсан байна.
БАРИМТ 9
2011 оны гуравдугаар сард НҮБ-ын Ерөнхий нарийн бичгийн даргын орлогчоор томилогдон ажиллаж байв.
БАРИМТ 10
2019 онд Казахстаны анхны Ерөнхийлөгч Нурсултан Назарбаев бүрэн эрхээсээ татгалзаж, Токаевыг өөрийн залгамжлагчаар нэрлэсний дараа сонгууль явуулж, Токаев сонгогдон төрийн тэргүүний үүргийг гүйцэтгэж эхэлсэн юм.
БАРИМТ 11
Түүний энэ удаагийн Монгол дахь төрийн айлчлал нь Бүгд Найрамдах Казахстан Улсын төрийн тэргүүний түвшинд 2008 онд хийсэн айлчлалаас хойш 16 жилийн дараа хэрэгжиж буй айлчлал юм.
Сэтгэгдэл (3)