Рэй Чарльзаас эхлээд Фрэнк Синатра, Майкл Жексон хүртэлх алдартнуудын хөгжмийн зохиолч, продюсер байсан Квинси Жонс таалал төгсчээ. Тэрбээр 91 насыг наслав. Түүний төлөөлөгч CNN агентлагт өгсөн мэдэгдэлдээ, “Бидний хайрт Жонс ням гаргийн шөнө Калифорниа мужийн Бел Эйр дэх гэртээ гэр бүлийнхнээрээ хүрээлүүлэн амар тайван нойрслоо” гэжээ.
Алдарт жазз, поп хөгжимчин Жонс нь төрөл бүрийн зохион арга хэмжээг байгуулагч, удирдаач, дуу бичлэгийн компанийн захирал, иргэний эрхийн төлөө тууштай тэмцэгч нэгэн байв. АНУ-ын Чикаго хотод мужаан аав, сэтгэцийн өвчтэй ээжтэйгээ өссөн түүний бага нас хүсэл мөрөөдлөөр дүүрэн байжээ.
Багаасаа Жонс хөгжимд дуртай болсон. Түүний хамгийн анхны сурсан хөгжим нь төгөлдөр хуур байв. Улмаар түүний авъяас чадвар, хүсэл эрмэлзэл хосгүй карьертай болгосон юм. Тэрбээр 1969-1981 онд A & M Records-той хамтран ажиллаж, өөрийн гэсэн нэртэй "Qwest" дуу бичлэгийн шошго үүсгэн байгуулжээ.
1982 онд Жонс Майкл Жексоны хамгийн их борлуулалттай "Триллер" цомгийг продюсерлэсэн нь замналынх нь хамгийн алдартай хамтын ажиллагааны нэг байв.
Гурван жилийн дараа тэрбээр Жексон болон бусад олон оддыг "We Are the World" дууг дуулахыг уриалав. Тэр жилдээ Стивен Спилбергийн найруулсан “The Color Purple” киноны хөгжмийг зохиосноор өргөн дэлгэцэнд амжилт олжээ.
Жонс 1993 онд хөгжим, соёлын "Vibe" сэтгүүлийг үүсгэн байгуулж, хэвлэлийн ертөнцөд хөл тавьсан. 1974 онд тархины аневризмын улмаас Жонс ажлын ачааллаа түр хөнгөлж, гэр бүлтэйгээ цагийг өнгөрөөхөд анхаарлаа төвлөрүүлжээ.
Л.Баяр
