Монголын Залуучуудын Холбооноос Хүүхдийн паркийн  газрын асуудлаар "Паркаа аваръя" хөдөлгөөнийг эхлүүлээд байгаа. “Паркаа аваръя” хөдөлгөөн нилээдгүй хүчтэй өрнөж,  олон байгууллага, хувь хүмүүс болон төрийн бус байгууллагууд нэгдэж, уг ажлыг дэмжиж байгаагаа илэрхийлэх болжээ. “Паркаа аваръя” хөдөлгөөний ажлын хүрээнд Монголын Сурагчдын Холбооны зүгээс дунд сургуулийн хүүхдүүдийн дунд “Парк маань ийм байгаасай” гар зургийн уралдааныг зарлажээ. Паркийн гол эзэд болсон хүүхдүүд маань  ханатлаа тоглох тоглоомтой, зугаалах ногоон цэцэрлэгтэй жинхэнэ гоё парктай болохыг хүсч, паркаа ямар байгаасай гэж хүсч мөрөөддөгөө харуулсан өөрсдийн зурсан зургаа илгээсээр байгаа бөгөөд аль хэдийн 150 гаруй бүтээл ирсэн гэнэ.   Хүүхдүүдийн бүтээлийг Монголын Сурагчдын Холбоо болон МЗХ-ны байранд хүлээн авч байгаа юм байна.