Өнгөрсөн баасан гарагт Сумын цолтон болон залуу бөхчүүдийн 121 дэх удаагийн ээлжит барилдаанд 608 бөх уран мэх, авхаалж самбаа сорин барилдсанаас Сумын заан Дашнямын Гантөгс анх удаагаа 10 даван түрүүлж, Төв аймгийн Дэлгэрхаан сумын харьяат, Аварга ДС-ийн бөх, сумын баяр наадмын хоёр түрүүтэй заан Батсүхийн Цогт үзүүрлэв.

Гуравт Өвөрхангай аймгийн Бат-Өлзий сумын харьяат, “Мөнх Өсөх Зам” ХХК, “Эв Монгол” клубын бөх, сумын баяр наадмын гурван түрүүтэй заан Д.Саранцогт, тавд Өмнөговь аймгийн Сэврэй сумын харьяат, “Говийн хүчтэн” дэвжээний бөх, сумын баяр наадмын зургаан түрүүтэй заан Г.Ганбат, Сүхбаатар аймгийн Онгон сумын харьяат, “Алдар” спорт хороо, ҮБХИС, “Жавхлант” дэвжээний бөх, сумын заан Д.Бямба-Эрдэнэ нар шалгарлаа.

Сумын цолтон болон залуу бөхчүүдийн барилдаан бүрд олгодог "Өсөх ирээдүйтэй бөхийн шагнал"-ыг Баян-Өлгий аймгийн Буянт сумын харьяат, сумын заан Б.Имангалид "Үнэнч үзэгчдийн нэрэмжит дайчин барилдааны шагнал"-ыг Сүхбаатар аймгийн Онгон сумын харьяат, сумын заан Д.Бямба-Эрдэнэд тус тус олгов.

БАРИМТ 1

Говь-Алтай аймгийн Бугат сумын харьяат Сумын заан цолтой бөх.

БАРИМТ 2

"Төрийн тусгай хамгаалалтын газар", "Хантайшир дэвжээ"-ний нэр дээрээс барилдаж байна. 

БАРИМТ 3

2002 есдүгээр сарын 12-нд төрсөн, 22 настай. 

БАРИМТ 4

Тэрбээр Сумын баяр наадамд гурван удаа түрүүлж, нэг удаа үзүүрлэжээ. 

БАРИМТ 5

Анх 2019 онд 17 насандаа "Сумын начин" болсон бол хоёр жилийн ард 2021 онд "Сумын заан" цолонд хүрсэн. 

БАРИМТ 6

Дараагаар нь 2023 онд Говь-Алтай аймгийн Бугат, 2024 онд Төгрөг сумдад цолоо баталсан. 

БАРИМТ 7

Тэрбээр бөхийн өргөөнд болсон "Сумын цолтон болон залуу бөхчүүдийн барилдаан"-д анх удаа түрүүлж буй.

БАРИМТ 8

Оны өмнө болсон уг барилдаанд зургаа давж, бага шөвөгт шалгарчээ. 

БАРИМТ 9

Үүнээс гадна тэр 2022, 2023 онд тав давжээ. 

Л.Баяр