Хөтөлбөр ажлын 20 хоног үргэлжилсэн бөгөөд дотоод болон гадаадын, идэвхтэй үйл ажиллагаа явуулж буй магадлан итгэмжлэгдсэн их, дээд сургуулийн бакалаврын гурав, дөрөвдүгээр ангид суралцаж буй 100 оюутан хамрагдсан юм.

УИХ-ын гишүүн Ч.Лодойсамбуу 1600 хүүхдээс шалгарч, нэг сарын хугацаанд бүтээлч ажилласан оюутнуудад амжилт хүсэж үг хэлсэн. Тэрбээр, улс төрийн үйл ажиллагааг дүгнэж, төрийн ажил, улс төрийн ялгаа заагийг ойлгосон гэдэгт итгэлтэй байна. Төрөөс гаргаж буй бодлого шийдвэр иргэдийн амьдралд ямар чухал нөлөөтэй гэдгийг оюутнууд та бүхэн харлаа. Хамт ажилласан гишүүдтэйгээ эргэх холбоотой ажиллаарай хэмээн захилаа.

УИХ-ын гишүүн Ш.Бямбасүрэн, Хөтөлбөр үр дүнтэй хэрэгжиж, залуучууд улс төрөөс залхсан энэ цаг үед оюутнуудыг цэгцтэй мэдээллээр хангаж, бодлого боловсруулахад гар бие оролцуулсан нь чухал хэрэгтэй арга хэмжээ болсныг тодотгоод, зөвхөн танилцах дадлагад хамрагдаад өнгөрөх биш цаашдаа оролцоотой ажиллаж, эх орныхоо хөгжилд хувь нэмэр оруулахыг хүссэн.

УИХ-ын Тамгын газрын дэд дарга Э.Лхагва, Төрийн ордонтой танилцаж, УИХ-ын үйл ажиллагаа хэрхэн явагддаг талаар тодорхой хэмжээнд мэдлэг хуримтлуулсан оюутнууддаа баяр хүргэе. Энэ удаагийн парламент “Гурван төгөлдөршил”-ийг баримтлан хүний эрхийг чухалчилж байна. Иргэд, олон нийтэд парламентын үйл ажиллагааг сурталчлан таниулахад дэмжлэг болж ажиллаарай хэмээн хүслээ.

Хөтөлбөрийн хүрээнд 30 гаруй сургалт, лекц, чөлөөт арга хэмжээ зохион байгуулж, дадлагажигч оюутнууд хөдөө, орон нутагт томилолтоор ажилласан юм. Мөн оюутнууд УИХ-ын гишүүдийн ажиллаж буй Байнгын хороод, ажлын хэсэгт орж ажилласан бөгөөд боловсруулсан зөвлөмжөө өнөөдөр УИХ-ын Тамгын газрын дэд дарга Э.Лхагвад хүлээлгэн өглөө.

Япон Улсын Хитоцүбаши их сургуулийн оюутан Г.Өсөхбаяр, Улсынхаа хууль тогтоох дээд байгууллагад ажиллах боломж олгосон Улсын Их Хурлын Тамгын газар, Монголын оюутны холбоонд талархал илэрхийлье. Нэг баг болон асуудлыг хамтдаа судалж, шийдвэрлэсэн найзууддаа баярлалаа. Миний цээжинд яг одоо “Гайхалтай” бас “Хурдан” гэсэн хоёрхон үг байна. Олон зүйл сурч, мэдэж авлаа. Хүн бүр өөрийн гэсэн асуух асуулттай орж ирээд түүндээ хариулт авсан байх. Бид энэ хөтөлбөрийн анхдагч учир хариуцлагатай байж, дараа дараагийн оюутан залууст боломж олгоё. Зүгээр нэг хөтөлбөрийн төгсөгч биш хариуцлагатай иргэн байя гэлээ.

МУИС-ийн Хууль зүйн сургуулийн оюутан Б.Ариунзаяа, Өөрийн үеийн хамгийн идэвхтэй 99 оюутантай хамт байлаа. Оюутан бүр нийгэм болон өөртөө, бусдадаа санаа сэтгэл тавьдаг хүмүүс байсан. Улсынхаа Төрийн ордонд ажиллах үнэхээр азтай хэрэг байлаа хэмээн сэтгэгдлээ хуваалцсан юм.

УИХ-ын гишүүн Ч.Лодойсамбуу, УИХ-ын гишүүн Ш.Бямбасүрэн, УИХ-ын Тамгын газрын дэд дарга Э.Лхагва нар хөтөлбөрт хамрагдсан оюутнуудад батламж гардууллаа гэж Улсын Их Хурлын Хэвлэл мэдээллийн газраас мэдээллээ.