2026 оны хөлбөмбөгийн ДАШТ Латин Америкт зөвхөн спортын төдийгүй соёлын шинэ үзэгдэл бий болгож, эцэг эхчүүд шинээр төрсөн хүүхдүүддээ дэлхийн аваргын оддын нэрийг өгөх болжээ. Перу улсад Норвегийн шигшээ багийн довтлогч Эрлинг Холандын нэрээр хэдэн зуун хүүхэд бүртгүүлсэн байна. Перу ДАШТ-д оролцоогүй ч Норвегийн багийн амжилт, Холандын тоглолт тус улсын хөлбөмбөг сонирхогчдын анхаарлыг ихээхэн татжээ.

Перу улсын Иргэний бүртгэл, таних мэдээллийн үндэсний байгууллагын мэдээлснээр, тус улсад 468 хүүхдийг “Haaland” нэрээр, 91 хүүхдийг “Erling Haaland” бүтэн нэрээр бүртгэсэн байна. Мөн дөрвөн хүүхдэд “Erling Braut Haaland” хэмээх нэр өгчээ. Ийнхүү Холандын нэртэй холбоотой бүртгэлтэй хүүхдийн тоо 563 хүрсэн байна.

Харин Лионель Месси, Бразилын Неймар, Португалын Кристиано Роналду зэрэг дэлхийн хөлбөмбөгийн домгуудын нэр ч Перуд олон мянган хүүхдийн нэрэнд шингэжээ. Тус улсын мэдээллээр, Мессигийн нэртэй 3402, Роналдогийн нэртэй 1185 хүн бүртгэлтэй байгаа бол Неймарын нэрийг авсан хүмүүсийн тоо 30 мянга орчимд хүрсэн байна.

Мексикт ч үүнтэй төстэй сонирхолтой явдал болжээ. Олон нийтийн сүлжээнд нэгэн охины төрсний гэрчилгээний зураг тархсан бөгөөд түүнд “Quiñona Ysisidra Morita Haaland Guevara” гэх нэр өгсөн байна. Энэ нэр нь Мексикийн хөлбөмбөгч Жулиан Киньонес, Хильберто Мора болон Норвегийн довтлогч Холандын нэртэй холбоотой аж. Мөн “Ysisidra” гэдэг нь Мексикийн хөгжөөн дэмжигчдийн ДАШТ-ий үеэр хэлж байсан “Y si sí?” буюу “Хэрэв тийм бол яах вэ?” гэсэн урианаас санаа авсан хувилбар гэнэ. Гэхдээ уг төрсний гэрчилгээний жинхэнэ эсэхийг Мексикийн эрх баригчид баталгаажуулаагүй байна.

Аргентинд ч дэлхийн аваргын нөлөө хүүхдийн нэр сонголтод тусжээ. Тус улсын Сальта мужид ДАШТ-ий финалын өмнөх долоо хоногт төрсөн хөвгүүдэд хамгийн их өгсөн нэрсийн жагсаалтыг Энцо, Эмилиано, Лионел тэргүүлсэн байна. Эдгээр нь Аргентины шигшээ багийн тоглогчид болох Энцо Фернандес, Эмилиано “Дибу” Мартинес болон багийн ахлагч Лионел Мессигийн нэртэй холбоотой аж.

Мексикийн “Sin manual para padres” подкастын хөтлөгч Фабиола Молинагийн хэлснээр, Латин Америкт алдартнуудын нэрээр хүүхдээ нэрлэх явдал шинэ зүйл биш. Энэ уламжлал 1986 оны ДАШТ-ий үеийн Диего Марадонагийн “Бурхны гар” хэмээн нэрлэгдсэн алдарт гоолын үеэс эхтэй гэж тэр тайлбарлажээ.

Түүний хэлснээр, өмнө нь “Backstreet Boys” хамтлагийн нэр хүнд оргил үедээ хүрэхэд олон эмэгтэй хөвгүүддээ Кевин, Брайан гэх мэт нэр өгдөг байсан бөгөөд үүний улмаас Боливи, Чили, Аргентин зэрэг оронд Брайан Гонсалес гэх мэт нэртэй хүмүүс олон болсон байна. Гэхдээ Молина алдартны нэрийг хүүхдэдээ өгөх нь ирээдүйд зарим хүндрэл дагуулж болзошгүйг анхааруулжээ.

“Инээдтэй санагдаж болох ч хүүхэд өсөж том болоход нь сөргөөр нөлөөлж ч мэднэ. Месси эсвэл Лионел гэдэг нэртэй байна гэдэг нь заавал сайн хөлбөмбөгчин болно гэсэн үг биш. Хувь тавилан таны нэрээр ирээдүйг тань урьдчилан тодорхойлохгүй” хэмээн тэр хэлсэн байна. Ийнхүү 2026 оны ДАШТ дэлхийн аваргыг тодруулахаас гадна Латин Америкийн шинэ үеийн хүүхдүүдэд хөлбөмбөгийн оддын нэрийг үлдээж, талбайн гаднах соёлын нөлөөгөө ч харуулжээ.

Л.Баяр