Хятадын хиймэл оюун ухааны салбарт хүчтэй өрсөлдөгч гэнэт гарч ирсэн нь АНУ-ын технологийн ертөнцөд дахин түгшүүр төрүүллээ. Бээжинд төвтэй "Moonshot AI" компанийн хөгжүүлсэн "Kimi K3" загвар нь код бичих, нарийн төвөгтэй асуудал шийдвэрлэх зэрэг чадвараараа АНУ-ын тэргүүлэх хиймэл оюун ухааны системүүдтэй өрсөлдөх хэмжээнд хүрсэн байна.

"Kimi K3"-ийн онцлог нь зөвхөн өндөр үзүүлэлтээр хязгаарлагдахгүй. Тус загварын амжилт нь Хятад улс хиймэл оюун ухааны салбарт АНУ-аас технологийн хувьд хоцорч байна гэсэн өмнөх төсөөллийг дахин эргэлзээнд оруулж байна. Сүүлийн үед Хятадын "DeepSeek" болон бусад компаниуд дэлхийн анхаарлыг татаж байсан бол "Moonshot AI"-ийн шинэ загвар энэ өрсөлдөөнийг улам хурцатгаж байгаа нь энэ.

"Moonshot AI"-г 2023 онд хиймэл оюун ухааны судлаач Ян Жилин тэргүүтэй баг үүсгэсэн. Түүний бүтээсэн Kimi чатбот нь урт хэмжээний бичвэр боловсруулах чадвараараа анх олны анхаарлыг татаж байв. Харин K3 загвар нь хиймэл оюун ухааны дараагийн үеийн “агент” системүүдэд чиглэж, хэрэглэгчийн өгсөн зорилгыг олон алхмаар бие даан гүйцэтгэх чадварыг хөгжүүлсэн байна.

Гэвч шинэ загварын амжилт Вашингтон, Бээжингийн технологийн өрсөлдөөнийг улам хурцатгав. АНУ-ын албаныхан "Moonshot AI"-г Anthropic компанийн хиймэл оюун ухааны загварын гаралтыг ашиглан өөрийн системийг сургаж, “дистилляци” хийсэн байж болзошгүй гэж буруутгажээ. "Moonshot AI" энэ төрлийн технологийн хулгай хийсэн гэх буруутгалтай холбоотойгоор АНУ-ын зүгээс нэмэлт хориг арга хэмжээ авах боломж ч яригдаж байна.

"Kimi K3"-ийн эрэлт асар хурдтай өссөнөөр "Moonshot AI" шинэ захиалгыг түр зогсоохоос өөр аргагүй болсон байна. Энэ нь нэг талаас хэрэглэгчдийн сонирхол асар их байгааг харуулсан ч нөгөө талаас өндөр хүчин чадалтай хиймэл оюун ухааны системийг ажиллуулахад шаардагдах тооцоолох хүчин чадлын хомсдол Хятадын компаниудын хувьд томоохон сорилт хэвээр байгааг харуулжээ.

Ийнхүү "Kimi K3"-ийн амжилт хиймэл оюун ухааны дэлхийн өрсөлдөөнийг шинэ шатанд гаргалаа. Хятад улс АНУ-ын технологийн хязгаарлалтыг даван туулж, дэлхийн хамгийн хүчирхэг хиймэл оюун ухааны системүүдийн нэгийг бүтээж чадсан эсэх нь одоо технологийн салбарын хамгийн их анхаарал татсан асуултуудын нэг болж байна.

Л.Баяр