АНУ-ын Ерөнхийлөгч Дональд Трамп Канадын зарим бараанд ногдуулах гэж байсан 50 хувийн шинэ татвараа гурав хоногоор түр хойшлуулах шийдвэр гаргажээ. Трамп наймдугаар сарын 18-нд Канадтай тохиролцоонд хүрэх боломж бүрдсэнтэй холбоотойгоор татварыг түр зогсоосон нь энэ ажээ. Хэрэв тохиролцоонд хүрээгүй бол шинэ татварын журам наймдугаар сарын 19-ний 00:00 цагаас хэрэгжиж эхлэх байсан юм.

Шинэ татвар нь Канадын АНУ руу экспортолдог нийт барааны ойролцоогоор 5 хувийг хамрах бөгөөд хоккейн мод, зөгийн бал, эмнэлгийн зарим хэрэгсэл зэрэг бүтээгдэхүүнд нөлөөлөхөөр төлөвлөгдсөн байна. АНУ, Канадын хоорондын худалдааны харилцаа аль хэдийн хурцадмал байгаа. Канад улс шинэ татвар хэрэгжвэл хариу арга хэмжээ авч, АНУ-ын бараанд өөрийн татварыг нэмэгдүүлэхээр заналхийлж байсан юм.

Канадын Ерөнхий сайд Марк Карни болон Трамп нар сүүлийн хоёр өдөрт утсаар ярьж, татвар болон худалдааны асуудлаар хэлэлцсэн байна.

АНУ, Канад өнгөрсөн онд бараа, үйлчилгээний чиглэлээр нийт 880 тэрбум ам.долларын худалдаа хийсэн. Канадын экспортын бараг 72 хувь нь АНУ-д чиглэдэг тул хоёр орны худалдааны дайн Канадын эдийн засагт хүчтэй нөлөөлөх эрсдэлтэй. Харин АНУ-ын хувьд импортын татвар нь эцсийн дүндээ импортлогч компаниуд болон хэрэглэгчдэд өндөр үнэ хэлбэрээр дарамт болох эрсдэлтэй.

Трамп тарифыг хоёр дахь бүрэн эрхийнхээ эдийн засгийн бодлогын гол хэрэгсэл болгосон. Тэрбээр өмнө нь Канадын зарим бүтээгдэхүүнд 50 хувийн татвар ногдуулахын тулд 1930 оны Тарифын тухай хуулийн 338 дугаар хэсгийг ашиглахаар төлөвлөсөн байна. Ийнхүү хоёр талын хэлэлцээ үргэлжилж байгаа энэ үед Вашингтон татварыг түр азнаж, Оттаватай эцсийн тохиролцоонд хүрэхээр дахин гурван хоногийн хугацаа авсан байна.

Л.Баяр