Хойд Солонгос ОХУ-ын Украинд явуулж буй дайнд дахин цэрэг илгээхээр бэлтгэж байгаа гэх мэдээлэл анхаарал татаж байна. Пёньян өмнө нь Орост олон мянган цэрэг илгээсэн бөгөөд одоо нэмэлт хүч дайчлах бэлтгэл үргэлжилж байгааг Өмнөд Солонгосын тал мэдээлжээ. 

Өмнөд Солонгосын тагнуулын болон батлан хамгаалахын байгууллагуудын үнэлгээгээр Хойд Солонгос 2024 оны сүүлээс хойш Орост 14,000–15,000 орчим цэрэг илгээсэн байна. Тэдний ойролцоогоор 6,000 нь 2026 оны хоёрдугаар сар гэхэд амь үрэгдсэн эсвэл шархадсан гэж Өмнөд Солонгосын Үндэсний тагнуулын алба тооцоолжээ.

Гэсэн ч Пёньян цэргийн оролцоогоо зогсоохын оронд Москвагийн талд дэмжлэгээ үргэлжлүүлэх хандлагатай байна. Есдүгээр сарын 9-нд Хойд Солонгосын удирдагч Ким Жон Ун тус улсын 78 жилийн ойн үеэр гадаадад цэргийн ажиллагаанд оролцож буй цэргүүддээ талархал илэрхийлсэн нь Орост байрлаж буй цэргүүдийг хэлсэн хэрэг хэмээн шинжээчид үзэж байна.

Хойд Солонгосын хувьд Орост цэрэг, зэвсэг нийлүүлэхийн хариуд эдийн засгийн тусламж болон цэргийн технологи авч байгаа гэх мэдээлэл бий. Ийнхүү хоёр улсын цэргийн хамтын ажиллагаа сүүлийн хоёр жилд эрс өргөжсөн байна. Есдүгээр сарын 7-нд хоёр улс хил дамнасан анхны авто замын гүүрээ нээсэн нь харилцаа улам ойртож буйг харуулсан үйл явдал боллоо.

Хойд Солонгосын шинэ цэрэг яг хэзээ, хэдий хэмжээтэйгээр Орост очих нь одоогоор тодорхойгүй байна. Өмнөд Солонгосын Батлан хамгаалах яам наймдугаар сарын сүүлчээр нэмэлт цэрэг илгээх бэлтгэл ажиглагдаж байгаа ч ойрын хугацаанд шууд хэрэгжих шинж тэмдэг тодорхой харагдаагүй гэж мэдээлж байв.

Хэрэв шинэ хүч Украинд оролцох нь батлагдвал энэ нь Оросын талын хүний нөөцийг нэмэгдүүлэхээс гадна Хойд Солонгосын бодит байлдааны туршлага хуримтлуулах боломжийг өргөжүүлж, Москва–Пёньяны цэргийн түншлэлийг улам гүнзгийрүүлэх төлөвтэй байна.

Л.Баяр