АНУ-д хууль бусаар очсон гэдэг нь тогтоогдоод байгаа Тиранозаурус Батаарыг Монголын тал гурван долоо хоногийн өмнө хүлээж авсан билээ. ССАЖ-ын яамнаас Батаарыг ирэх сарын 1-н буюу Хүүхдийн баяраар  Сүхбаатарын талбай дээр олон нийтэд үзүүлнэ гэж байсан ч ирэх сарын 10-ныг хүртэл хойшлуулсан байна. Сүхбаатарын талбайд Батаарыг байршуулах түр музейг барьж байгаа ч зарим нэг хүндрэлтэй асуудлаас болж ийнхүү хойшлуулжээ. Гэсэн ч ирэх сарын 10-ны дотор түр музейг барьж дуусаад "Батаар"-ыг олон нийтэд үзүүлэхээ мэдэгдлээ. Энэ талаар ССАЖЯ-ны Соёлын өвийн хэлтсийн дарга Ц.Цэндсүрэнтэй товчхон ярилцлаа.

-    Яг ямар шалтгаанаар зургаан сарын 1-нд Батаарыг үзүүлж чадахгүй болов?

-    Бид үлэг гүрвэлийн түр музейг хийдгээрээ хийж байна. Дотоод бэлтгэлээ хангаж байна. Аль болохоор хурдан нээж үзүүлнэ. Гэхдээ зургаан сарын 1-нд нээж чадахгүй болчихлоо. Батаарыг дэлгэж тавихад тодорхой хэмжээний шаардлагуудыг хангаж ёстой. Тухайлбал хүйтэн халуун, чийг, дулаан гэх мэт хадгалалт хамгаалалтын стандартад хүндрэл гараад байна. Батаар түр зуурын байранд байх учраас олон ажил хийх шаардлагатай болсон. Түүнээс бид бол өдөр шөнөгүй л ажиллаж байна. Арай амжсангүй. Гэхдээ зургадугаар сарын 1-нд 16 нас хүртэлх хүүхдүүд бүх музейг үнэгүй үзэж болно. Харин байгалийн түүхийн музей засвартай байгаа учраас ажиллахгүй.

-    Үлдсэн батаарууд хэзээ ирэх вэ?

-    Эхнээсээ ирж байгаа. Бид монголын маш олон үнэт өвийг авчирч байгаа. Батаарын араас 23 ширхэг амьтан ирнэ. Эдгээр амьтдыг дэглэх сав хэрэгтэй байгаа. Харин Батаар маань манай үлэг гүрвэлийн төв музейн нэг номерын үзмэр болно. Үүнийг дагалдаад Байгалийн түүхийн музей болон палентлогийн төвд байгаа бүх үзмэрүүдийг бүртгэж авах бэлтгэл ажлаа хийгээд явж байна. Батаарыг байршуулах байр их хүндрэлтэй байгаа. Түр байр маань зориулалтын байр биш учраас бидэнд стандартад заагдсан дулаан, чийгшил гэх мэтийн хүндрэлтэй асуудал гарсан.

-    Үлэг гүрвэлийн музейд ойролцоогоорхичнээн үзмэр тавигдах вэ?

-    Ойролцоогоор 500 гаруй үзмэр гаднаас бэлнээр ирнэ.

-    Япон, Солонгост байгаа үзмэрүүдийн талаар тодруулна уу?

-   Япон улсад ССАЖ-ын яамны зөвшөөрлөөр өнгөрсөн онд үзэсгэлэн гарсан. Осако хотноо 26 ширхэг үлэг гүрвэл дэлгэгдсэн. Одоо үзэсгэлэн зургадугаар сард бууна. Тэгэхээр нь Монголд авчирна.