Зарим хүний Пи Ар арай ч дэндээд байна уу гэмээр. Цөмийн энергийн газрын дарга Н.Тэгшбаяр өмнөх дарга С.Энхбатын унаж байсан бүрэн тоноглолтой УНЗ 0073 дугаартай Ланд-200 автомашиныг үргэлж "ад" үздэг. Тиймээс ч Төрийн өмчийн хороонд буцааж өгнө гэж өнгөрсөн жил хэлж байсныг та бүхэн санаж байгаа байх. Гэтэл саяхан Онцгой байдлын ерөнхий газарт шилжүүлсэн тухай сураг сонсогдлоо. Тэрбээр энэ тухайгаа “Цас зуд гээд өвөл хүндрэх төлөвтэй байгуу учраас Онцгой байдлын албаныханд хэрэг болох болов уу гээд “Ландкруйзер 200" машиныг шилжүүллээ” гэв. 

Мөн тэрбээр Нийслэлийн Засаг дарга Э.Бат-Үүл тансаг зэрэглэлийн машинаас татгалзсаныг дэмжиж өөрөө ч тансаг машин унахгүй гэж ам гараад байгаа. Улмаар бусад агентлагийн дарга нарыг ч жийпнээсээ татгалзахыг уриалаад амжсан нэгэн.

Тэгвэл “Соната 6” унаж хамаг л ажлаа амжуулдаг гэх түүний энэ үйлдлийг хүмүүс сайнаар хэлэх биш харин бялдуучилж, хэрэггүй зүйлээр пи ар хийж байна хэмээн үзэж байна.

Түүнчлэн  дараагийн 2016 оны УИХ-ын сонгуульд төрсөн нутаг болох Увсын тойрогт нэр дэвших магадлал өндөр тул ийнхүү эхнээсээ нүхээ малтаж эхэллээ хэмээн хардах хүмүүс ч цөөнгүй байгаа юм.