Өөрийн гэсэн агентлаг байгуулан, гэр бүлийн амьдрал зохиож, хөөрхөн хүүхэдтэй болсон мисс Х.Бадамгэрэлтэй цөөн хором, чөлөөт сэдвээр ярилцлаа.

-Миссүүд олны танил бүсгүйчүүдийг гоо сайхандаа их анхаарч, олсон мөнгөө бараг гоо сайхны бараа, ганган хээнцэр хувцас хэрэгсэлдээ зарцуулдаг гэх юм. Таны хувьд?
-Гоо сайхны нэг сарын хэрэглээгээ бөөнд нь авчихдаг. Сардаа 300 гаруй мянган төгрөг зарцуулдаг байх. Эмэгтэй хүнд байнгын хэрэгтэй нүүр цэвэрлэх бүтээгдэхүүн, нүүрний будаг зэргээ сар бүр шинэчилж авахыг хичээдэг.

-Өнөөгийн бүсгүйчүүд орчноо дагаад ч тэр үү эрчүүдийг хүндлэх тал дээр арай сул юм шиг харагддаг. Таны хувьд саяхан гэр бүл зохиолоо. Энэ тал дээр хэр суралцаж байна?
-Маш олон талаас нь харж, шинжиж байж үнэхээр хийх ёстой юм аа хийж чаддаг эр хүнийг хүндэлж чадна. Тухайлбал, эрэгтэй хүн хамгийн анх хүнтэй яаж харьцаж байна. Тухайн хүн хүн рүү эгцэлж хараад, хэлэх гэснээ хэлчиж чадаж байна уу. Хэл яриа нь цэгцтэй байна уу? гэх мэт эмэгтэй хүмүүсийн шинждэг зүйлсээр л шинжинэ.

-Бүсгүйчүүдийг ажиглаад байхад их романтик, халамжтай хүнийг хүсэмжилдэг юм шиг.  Таны нөхөр хэр романтик хүн бэ?
-Романтиклах зүйл дээрээ романтик байж чаддаг. Гэхдээ хоёулаа их ажилтай байдаг. Тиймээс ажил мэргэжил дээр нь дэм өгч, нэгнийгээ их дэмждэг. Хүүгээ гарсанаас хойш бүр завгүй болсон. Гэвч хайртай л юм чин нэгэндээ цаг хугацааг зарцуулж чаддаг. Анх үерхэж байхдаа их романтик хосууд байсан. Тухайлбал, өдөр бүр л сарнай цэцэг өгөхийг хичээдэг байсан. Ажлын цагийн хуваарь өөр учир гэнэтийн бэлгийг их барьдаг байсан. Ер нь романтик талруугаа хүн.

-Ер нь таны хувьд эрчүүдээс хамгийн түрүүнд зан харилцааг нь хардаг гэж ойлгож болох уу. Яг юуг нь чухалчилж хардаг вэ?
-Хамгийн түрүүнд тухайн хүн өөрийгөө яаж илэрхийлж байгаа нь чухал. Үүний дараа хувцаслалтыг нь хардаг. Мөн эрэгтэй хүн цаг зүүсэн, гутал нь цэвэрхэн байх ёстой гэж боддог.

- Хүн амьдралдаа ганцхан удаа дурладаг гэдэгтэй санал нийлдэг үү?
-Хайр бол ганцхан байдаг. Дурлал бол олон байдаг. Олон удаа дурлаж болохгүй гэсэн зүйл байхгүй. Миний хувьд агентлагт багшилдаг учир гадуур сайхан бүсгүй, залуу явж байвал би дурлаад л өнгөрдөг. Бүр сайхан харагдаад байвал очиж уулзаж, нэрийн хуудсаа ч өгч, хамтарч ажиллах санал тавьдаг. Миний хувьд би их дурладаг. Тиймээс ч хамтарч ажиллах санал тавьдаг.

-  Бухимдсан үедээ согтууруулах ундаа хэрэглэдэг үү?
-Архи дарс, согтууруулах ундаагаар сэтгэлээ тайвшруулдаггүй. Бухимдсан үедээ хүнтэй ярилцдаг. Сайн найз, хайртай хүн, ээж, дүү нартайгаа ярилцаж, зөвлөгөө авдаг. Гэхдээ нэүртэх тохиолдол бага.

-Өдөрт  цахим хуудсаар чинь хэчнээн танилцья гэсэн хүсэлт ирдэг вэ?
-Танилцая гэсэн хүсэлт цөөхөн. Харин зөвлөгөө өгөөч, өөрийнхөө туршлагаас хуваалцаач гэсэн зүйл байгаа.

-Таныг нөхөртэйгөө явж байхад  хуучин найз залуу чин ирж яриа өдвөл хэрхэх вэ?
-Дуугүй суугаад байхгүй байх. Гэхдээ тухайн хүн өөрийгөө болон биднийг эвгүй байдалд оруулах зүйл хийхгүй байлгүй дээ. Үүн дээр бол би сандраад, айж барих зүйл байхгүй шүү дээ.