Хуулийн салбарт шинэчлэл эрчимтэй хийгдэж байна. Тухайлбал, өмнө нь хуульчийн сонгон шалгаруулалтад тэнцэж, хуульч болсон эрхзүйчид дахин өмгөөллийн сонгон шалгаруулалтад тэнцсэнээр өмгөөлөл үзүүлэх эрхээ олж авдаг байсан бол шинэ хуулиар хуульчийн сонгон шалгаруулалтад тэнцсэн хуульч “Хуульчдын холбоо”-нд бүртгүүлж, Улсын дээд шүүхэд бүртгэгдсэнээр өмгөөлөл үзүүлэх эрхтэй болж байна. Тэгвэл энэ талаар “Хуульчдын холбоо”-ны Ерөнхийлөгч Д.Батсүхтэй ярилцлаа.

-Өмгөөлөл үзүүлэх хуульч заавал Улсын дээд шүүхэд бүртгүүлэх шаардлагатай гэнэ. Энэ талаар мэдээлэл өгөөч?
-Хуульчийн эрхзүйн байдлын тухай хуулиар өмгөөллийн үйл ажиллагаа үзүүлэх эрхийг шүүхэд төлөөлөх эрхтэй холбож зохицуулсан байгаа. Тэгэхээр өмгөөллийн үйл ажиллагаа явуулах хуульчид Улсын дээд шүүхэд өмгөөлөгчдийн нэрсийн жагсаалтад бүртгэгдсэнээр шүүхэд төлөөлөх эрхээ олж авч байгаа. Улсын дээд шүүхэд бүртгэгдээгүй хуульч бол өмгөөллийн үйл ажиллагаа явуулах эрхгүй. Хуульчийн мэргэжлийн үйл ажиллагааны төрөл хэлбэр, мэргэжлийн үйл ажиллагаа явуулагч гэж хэнийг хэлэхэв гэдгийг хуульчийн эрхзүйн байдлын тухай хуулиар тодорхой зохицуулсан.

-Хэрвээ бүртгүүлээгүй хуульч өмгөөлөл үзүүлвэл яах вэ?
-Хуульчийн мэргэжлийн үйл ажиллагаа явуулах зөвшөөрөл аваагүй аливаа этгээд өөрийгөө хуульч гэж нэрлэх, хуульчийн мэргэжлийн үйл ажиллагаа явуулахыг хуульчийн эрхзүйн байдлын тухай хуулиар хориглосон байгаа. Хэрвээ энэ хуулийн зохицуулалт заалтыг зөрчих юм бол зөрчсөн үйлдэл нь гэмт хэрэгт тооцогдохооргүй байвал захиргааны хариуцлага хүлээлгэнэ. Харин хуульч өмгөөлөгчийн нэр барьж гэмт хэрэг үйлдсэн бол хуулийн дагуу эрүүгийн хэрэг үүсгэн шалгаж, шийтгэнэ.

-Өнөөдрийн байдлаар хэчнээн хуульч дээд шүүхэд бүртгүүлээд байгаа вэ?
-Яг одоогоор Улсын дээд шүүхэд өмгөөлөгчийн жагсаалтад бүртгэгдсэн 1600 орчим хуульч байна. Эдгээрээс гадна хуульчийн нэгдсэн бүртгэлд бүртгэгдсэн хэрнээ өмгөөллийн үйл ажиллагаа эрхлээд байгаа хуульч байхыг үгүйсгэхгүй. Энэ талаар өнөөдрийн байдлаар хуульчдын холбоонд тодорхой мэдээлэл ирээгүй байна. Иргэдээс болон бусад байгууллагаас гомдол санал ирээгүй байна. Яг шүүх, мөрдөн байцаалтын ажиллагаанд орсон тохиолдолд тухайн байгууллага шүүхэд төлөөлөх эрх үнэмлэхийг нь шалгаж байгаа. Тэгэхээр тухайн албан тушаалтнууд шүүх прокурорын байгууллага үнэмлэх шалгаад явж байгаа тохиолдолд өмгөөлөх эрхгүй хуульч оролцож байна гэж үзэхгүй байна.