Хэдхэн хормын өмнө ШӨХТГ-аас сэтгүүлчдэд цаг үеийн асуудал хийгээд зарим шалгалт, зөрчлийн талаар мэдээлэл хийсэн юм. Энэ үеэр О.Магнай даргаас сэтгүүлчид зарим асуултыг тавьж, харин тэрбээр эргүүлээд сонирхолтой хариултуудыг өгсөн юм. Энэ бүхнийг багцлан хүргэж байна.

-Орон сууцны үнэ дээр хяналт тавьж байна уу?
-Орон сууцны үнэ буурч, хөөс хагарч байна гэж үзэж байна.

-Циркийн асуудал яагаад нам жим болчихов?
-Циркэд 9 сарын хугацаатай шаардлага хүргүүлсэн. Есөн сарын дотор цирк үйл ажиллагаагаа хэвийн явуулж “жинхэнэ” цирк болох ёстой. Үндэсний цирк бол бидний шаардлагуудад хүндэтгэлтэй хандаж албан бичгүүдийг ирүүлсэн. Харин “ Royal plaza”-гийн хувьд ямарваа нэг бичиг ирүүлээгүй. Бид циркийг төр буцааж авая гэдэг саналаа ТӨХ-нд хүргүүлсэн. Ойрын үед энэ асуудал шийдэгдэх байх.
ССАЖЯ-ны сайд Ц.Оюунгэрэл дээр энэ асуудал хоёр сар саадсан. Миний ойлгож байгаагаар Ц.Оюунгэрэл, Д.Сумьяабазар хоёр сайн харилцаатай юм шиг байна лээ. Ц.Оюунгэрэл юм л болохоор Д.Сумьяабазартай уулзая гэдэг юм билээ. Ингэж явсаар хоёр сар саатуулсан. Сүүлдээ Ц.Оюунгэрэлийг хүлээх шаардлагагүй юм байна гэж үзээд ТӨХ руу бичиг явуулсан. Ц.Оюунгэрэл  бол энэ дээр зарчмын хувьд ёсзүйн хариуцлага хүлээх ёстой байх.

-Таны ажилдаа баримталдаг зарчим юу вэ?
-Манай улсад хэний ч хариуцдаггүй ажил байна. Үүнийг хэн нэгэн хариуцах хэрэгтэй. Энэ бол миний ажлын зарчим. 

-Иргэний агаарын тээврийн компаниудын талаар хэр зөрчил ирж байна. Саяхан “Изинис Эйрвэйз” дампуурлаа шүү дээ?
-Төрөөс иргэний нисэхийн чиглэлд баримтлах бодлого дээр хүртэл бид Ч.Сайханбилэг сайдруу бичиг явуулсан. Яагаад гэвэл ганцхан МИАТ-д давуу эрх олгосон асуудал байсан. Улмаар Зам тээврийн сайдтай ярилцаж байгаад үүнийг Үндэсний авиа компани гэж өөрчилж байгаа. Яг тэр маршруттай холбоотой гомдлууд байгаа. Уг нь “Изинис эйрвэйзтэй” холбоотой гомдлууд байсан. Тэр уг нь шийдэгдэх шатандаа явж байсан ч харамсалтай зүйл боллоо.

-Танайхаас  зөвхөн иргэдээс ирсэн гомдлын дагуу бус өөрсдөө зарим газруудад шалгалт хийж болдоггүй юм уу?
-Намайг засгаас О.Магнай чи дэндүү их юм шалгаад байна. Одоо Эдийн засгийг хөгжүүлэх 100 хоногийн хүрээнд чи битгий шалга. Тайван бай. Үнэхээр гомдол ирвэл үүний дагуу ажил гэсэн. Заримдаа яг өөрийнхөөрөө ажиллахад хэцүү байна.