Ардчилсан намын Ерөнхий нарийн бичгийн даргын үүрэг гүйцэтгэгч Л.Эрхэмбаяр, АН-ын Намын байгуулалтын газрын дарга Л.Уртнасан, Ерөнхий нарийн бичгийн даргын зөвлөх Б.Цолмонбаяр нар өнөөдөр хэвлэлийнхэнд хандаж мэдээлэл өглөө.
Ардчилсан намын генсек Л.Эрхэмбаяр энэ үеэр ярихдаа “Ардчилсан нам 2015 оны найм, есдүгээр сард “Монгол хүн 2020 өнөөдөр, маргааш...” бүсийн чуулганыг баруун, зүүн, хангай, төвийн бүсэд намынхаа гишүүд дэмжигчдийн хүрээнд амжилттай зохион байгууллаа. Энэ чуулганыг хийх явцад гишүүдийн зүгээс “Ардчилсан нам хийсэн ажилтай, хэлэх үгтэй байна. Үүнийгээ ард түмэндээ тайлагнах хэрэгтэй” гэсэн үүрэг даалгаврыг өгсөн. Тиймээс Ардчилсан нам аравдугаар сарын 10-аас арванхоёрдугаар сарын 10-ны хооронд орон даяар Ардчилсан намын мөрийн хөтөлбөрийг тайлагнах өдрүүдийг эхлүүлж байгаагаа мэдэгдэж байна” гэв.
Бүсийн чуулганыг зохион байгуулахад явцад чуулганд оролцсон Ардчилсан намын 5000 гаруй гишүүд дэмжигчид, иргэдийн хэлсэн санал санаачлагуудыг нэгтгэж дүгнэжээ. Энэ үеэр “Монгол хүн 2020” мөрийн хөтөлбөрийн таван сайн ажлыг нэрлэсэн байна.
Нэгдүгээрт, Бүтээн байгуулалт-Чингис бондийг сайн ажлаар нэрлэжээ. Энэ ажлын хүрээнд зам, барилга, үйлдвэржилт, шинэ сумын төв, Улаанбаатар хотын замын шинэчлэл зэрэг ажлуудыг иргэд онцлон нэрлэсэн байна.
Хоёрдугаарт, Үнэ тогтворжуулах хөтөлбөр иргэдийн амьдралд тус болсон сайн ажлын нэг гэдгийг нэрлэсэн байна. Энэ ажлын хүрээнд Монгол банкнаас 4 тэрбум төгрөгийг аж ахуй нэгжүүдэд зээлээр өгсөнөөс эргэн төлөлт хэвийн байгааг Монголбанкнаас мэдэгджээ.
Гуравдугаарт, боловсролын салбарт хийгдэж байгаа ажил буюу Зөв Монгол хүн хөтөлбөрийг сайн хэрэгжсэн ажлын нэгээд тодруулжээ. Эл хөтөлбөр хэрэгжсэнээр хүүхэд болгон өөрт байгаа авъяасаа хөгжүүлэх боломжийг нээж өгч байгаа нь хүүхэд багачууд гэлтгүй эцэг, эхчүүдийн талархлыг хүлээсэн ажил болсон байна.
Харин дараагийн сайн хэрэгжсэн ажлаар 1990-1995 оны хооронд ажилласан жил нь тасарсан хүмүүсийг ажилласанд тооцох хууль батлагдсанаар 586 мянган хүн ажилласан жилээ нөхөн бүртгүүлсэн нь Ардчилсан намын гол ажлын нэг гэж дүгнэсэн байна.
Улсын төсвөөс УИХ-ын гишүүдийн багц гэж тус бүр нэг тэрбум төгрөг өгдөг байсныг зогсоож, Орон нутгийн хөгжлийн сангийн хөрөнгө болгосон нь 273 тэрбум төгрөгийг орон нутаг өөрсдөө мэдэж зарцуулдаг болсон нь сайн хэрэгжиж байгаа ажлын нэг гэж дүгнэжээ.
Эдгээр ажлууд нь бүгд Н.Алтанхуягийн Засгийн газрын үед санаачлан эхлүүлж, хэрэгжүүлж байгаа ажлууд билээ.
Дашрамд дурдахад, АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр мэдээлэл хийснийхээ дараа сэтгүүлчдийн сонирхсон асуултад хариулсангүй. Тэрбээр "Би мэдээлэл хийх гэсэн юм. Түүнээс асуултад хариулахгүй" гэв.
Т.Энхэлээ
Сэтгэгдэл (35)