Энэ сарын 5-8-нд шилжих шөнө Сэлэнгэ аймгийн Сүхбаатар суманд үл таних
долоон залуу 24 настай эмэгтэйг гурав хоногийн турш буудал дамжуулан
хүчиндсэн хэрэг гарсан.
Энэ сарын 5-8-нд шилжих шөнө Сэлэнгэ аймгийн Сүхбаатар суманд үл таних долоон залуу 24 настай эмэгтэйг гурав хоногийн турш буудал дамжуулан хүчиндсэн хэрэг гарсан. Хэрэг мөрдөн байцаалтын шатанд яваа бөгөөд эх сурвалжийн мэдээлснээр, хохирогч эмэгтэй анх “Орхон” зочид буудалд найз залуутайгаа орж ирсэн байна. Харин дараа нь найз залуу нь найзуудаа дуудсан байна.
Хэдийгээр хохирогч охины ар гэрийнхэн “Миний дүүг зүс таних залуус хүнсний дэлгүүрээс гарч явахад нь хүчээр буудалд чирч оруулсан. Улмаар ам руу нь архи цутгаж, гурав хоног хүчирхийлсэн. Тэднийг суллаж явуулахад нь дүү маань найз залуу дээрээ шууд очиж үнэнээ хэлж, бидэнд мэдэгдсэн. Бид ч тэр даруй цагдаад хандсан” хэмээн мэдэгдэж байсан ч цагдаагийн байгууллага өөр тайлбар өгч байгаа билээ.
Тодруулбал, “Хүчирхийлэл үйлдэгдсэн гэх гурван өдрийн турш хохирогч эмэгтэйтэй найз залуу нь хамт байсан. Тэгээд ч хүнийг хүч хэрэглэн гурван буудалд оруулж, хүчирхийлэл үйлдэж байхад буудлын ажилтнууд цагдаад мэдэгдэх нь тодорхой. Ямар учраас ар гэрийнхэн нь ташаа мэдээлэл өгснийг гайхаж байна. Одоогоор хэргийг шалгаж байгаа болохоор өөр тодорхой мэдээлэл өгөх боломжгүй” гэв.
Одоогоор Сэлэнгэ аймгийн цагдаагийн хэлтэст уг хэргийг үйлдсэн байх магадлалтай залуусыг цагдан хорьж, эрүүгийн хэрэг үүсгэн шалгаж байгаа. Мөн “Орхон”, “Цэцэг”, “Солонго” зочид буудлын ажилтнуудаас гэрчийн мэдүүлэг авч байгаа аж. Зарим эх сурвалжийн хэлж буйгаар хэрэгт сэжиглэгдэж буй долоон залуугийн тавынх нь нэр тодорхой болсон байна. Гэвч хэргийн мөрдөн байцаалтын ажиллагаа дуусаагүй учир нэрийг нь одоохондоо нууцлахаар болжээ.
Сэтгэгдэл (23)