Өнгөрсөн нэгдүгээр сарын 5-8-нд шилжих шөнө Сэлэнгэ аймгийн Сүхбаатар суманд үл таних долоон залуу 23 настай эмэгтэйг гурав хоногийн турш буудал дамжуулан хүчиндсэн хэрэг гарсан.
Хэрэг мөрдөн байцаалтын шатанд яваа бөгөөд хэвлэлээр хохирогч эмэгтэй анх “Орхон” зочид буудалд найз залуутайгаа орж ирсэн. Харин дараа нь найз залуу нь найзуудаа дуудсан байна” хэмээн цацагдсан.
Харин хохирогч охины ар гэрийнхэн “Миний дүүг зүс таних залуус хүнсний дэлгүүрээс гарч явахад нь хүчээр буудалд чирч оруулсан. Улмаар ам руу нь архи цутгаж, гурав хоног хүчирхийлсэн. Тэднийг суллаж явуулахад нь дүү маань найз залуу дээрээ шууд очиж үнэнээ хэлж, бидэнд мэдэгдсэн. Бид ч тэр даруй цагдаад хандсан” хэмээн мэдэгдсэн юм.
Ингээд хэргийн явцын талаар ЦЕГ-ын Хэвлэл мэдээллийн төвийн ажилтан Б.Саруултуяатай ярилцлаа.
-Сэлэнгэ аймагт гарсан долоон залууд нэг эмэгтэй хүчиндүүлсэн гэх хэрэг юу болов. Шалгалтын ажиллагаа дуусч байна уу?
-Хэвлэл мэдээллийн хэрэгслээр долоо залуу нэг эмэгтэйг хүчирхийлсэн гэсэн буруу ташаа мэдээлэл цацагдсан. Хэргийн хувьд Сэлэнгэ аймгийн цагдаагийн байгууллага мөрдөн байцаалтын ажиллагааг үргэлжлүүлэн хийж байна. Анх хохирогч эмэгтэй цагдаагийн байгууллагад гомдол гаргаснаар хэргийг шалгаж эхэлсэн.
-Мөн хэвлэл мэдээллийн хэрэгслээр эмэгтэйг өөрөөсөө болж хүчирхийлүүлсэн гэх мэдээлэл ч цацагдаж байсан?
-Мөрдөн байцаалтын явцад хохирогч холбогдогч нарын аль алинд нь буруутай үйлдэл илэрсэн. Мөн хохирогч эмэгтэйн хувьд долоон залууд хүчиндүүлээгүй гэдэг нь шүүх шинжилгээгээр тогтоогдсон. Шүүх эмнэлгийн шинжилгээний хариугаар хохирогч эмэгтэйгээс хоёр залуугийн үрийн шингэн илэрсэн байгаа.
-Тэгэхээр үрийн шингэн илэрсэн хоёр залууг л шалгаж байгаа гэсэн үг үү?
-Хэрэгт холбогдсон хоёр холбогдогчийг шалгаж байна. Гэхдээ бүх хүнээс мэдүүлэг авч, мөрдөн байцаалтын ажил явагдаж байна. Хохирогч холбогдогч нар өмнө нь нэг нэгнийгээ мэддэг, уулздаг байсан байна. Хохирогчийг ч мөн адил шалгаж байна. Энэ хэрэг прокурорт шилжээгүй. Холбогдогч нар хүчингийн хэрэг үйлдсэн эсэхийг тогтоож байна.
-Хэргийг үйлдсэн залуучуудын тухай?
-Долоон залуугийн хувьд бүгд 23 настай.
-Хохирогч эмэгтэйн тухай?
-Хохирогч эмэгтэй 23 настай, эрхэлсэн ажилгүй, оюутан. Хэрэг гарсан өдөр буудлын үйлчлэгчээр ажиллаж байсан хүний мэдүүлгээр хохирогч эмэгтэй архи уугаад залуусын өвөр дээр тамхи татаад сууж байсан гэсэн. Хэвлэл мэдээллийн хэрэгслээр ташаа мэдээлэл өгсөн. Долоон залуу хүчиндсэн байдал илрээгүй.
-Хэрэгт сэжиглэгдэж байгаа хоёр залууг цагдан хорьсон уу?
-Цагдан хориогүй байна. Долоон залууд эрүүгийн хэрэг үүсгээд мөрдөн байцаалтын ажиллагаа явуулж байна.
-Гурван буудлаар авч явсан нь ямар учиртай юм бол?
-Одоогийн байдлаар эдгээр залуус нэг нэгнээ таньдаг, цуг архи уусан. Нэг буудлаас гараад үргэлжлүүлээд нөгөө буудал руу явсан. Хэргээс харахад хохирогч эмэгтэй өөрөө биеэ үнэлж байж болзошгүй байдал ажиглагдаж байгаа. Гэхдээ шүүх шинжилгээгээр хүчиндсэн эсэхийг тогтооно.
-Уг хүчингийн хэрэг гарсан буудлыг өмнө нь ч хүчингийн хэрэг үйлдэгдэж байсан буудал гэж байсан. Ер нь буудалд нь шалгалт хийв үү?
-Зочид буудлуудын хувьд буруутай үйлдэл байна. Сэлэнгэ аймагт үйл ажиллагаа явуулж байгаа буудлуудын хувьд ялангуяа хэрэг гарсан дэн буудлууд зөвшөөрөлгүй, хяналт тавьдаг газар ч байхгүй байсан. Үйл ажиллагаа явуулж байгаа нь архидалтыг өөгшүүлсэн байдалтай. Тэнд хүн амрах орчин бүрдээгүй байна.
-Тэгээд зөрчлөө арилгах шаардлага хүргүүлсэн үү?
-Цагдаагийн байгууллагаас бүртгэл байгаа эсэхийг шаардаж, шалгасан. Буудлаар үйлчлүүлж байгаа тохиолдолд тухайн үйлчлүүлэгчийг заавал бүртгэж авах ёстой. Гэтэл хүчингийн хэрэг үйлдэгдсэн гэх гурван буудал гурвуулаа бүртгэлгүй, архидан согтуурахыг хөхүүлэн дэмжсэн маягтай байгаа нь тогтоогдсон. Мөн Сэлэнгэ аймгийн нутаг дэвсгэр ялангуяа буудлуудын хувьд камер гэж байхгүй. Энэ нь хэргийг илрүүлэхэд хүндрэл учруулж байна. Нэг буудал нь камертай ч эвдэрхий камер суурилуулсан байна. Энэ мэт буудлуудын зүгээс буруутай үйл ажиллагаа гарч ирж байгаа юм. Тухайн гурван буудалд мэдэгдэл өгсөн байгаа. Мөн тухайн гурван буудлын үйл ажиллагааг хүчингүй болгох саналаа явуулсан байгаа. Ер нь Сэлэнгэ аймгийн нутаг дэвсгэрт зөвшөөрөлтэй, стандартын дагуу үйл ажиллагаа явууж байгаа зочид буудлууд цөөхөн байна.
Б.Чимэг
Сэтгэгдэл (23)