Лаазтай бүтээгдэхүүнээс өт гарч, ундаанаас мөөгөнцөр илэрч  бусад бүтээгдэхүүнээс юуных нь мэдэгдэхгүй шүд гарч ирэх нь энгийн үзэгдэл болсон мэт элбэг тохиолддог болжээ. Хүн төрөлхтөн найдвартай аюулгүй бүтээгдэхүүн хэрэглэж байж л эрүүл энх аж төрнө. Гэтэл бидний мэдэх томоохон компаниудын бүтээгдэхүүн мөн хүмүүсийн байнгын хэрэглээ болсон зүйлүүдээс дээрх зөрчлүүд гарч ирсээр байгаа юм. Уг нь МХЕГ, ШӨХТГ гэх мэт газруудаас энд тэнд шалгалт хийж зөрчил дутагдал илрүүлж, улмаар зөрчлийг нь арилгуулаад яваад байгаа л гэдэг. Тэгвэл иргэдийнхээ гомдлыг хүлээж авч, тухайн бүтээгдэхүүнийг шалгаж нягталвал яасан юм бэ?. Адаглаад ямар орчинд бүтээгдэхүүнээдээ хийж хэрэглэгчдийн гарт хүргэж байгааг анхаарах цаг болсон гэлтэй.

Он гарснаас хойш зөвхөн хувь хүмүүсээс ирсэн гомдол санал, зөрчлөөс зөвхөн 5 баримт л дэлгэхэд , “Витафит” ХХК-ийн “Гоё”, “Био” жүүс, “Атар өргөө” компанийн “Гэрийн боорцог”,  “Талх чихэр” компанийн “Зууван чех” гэх хэрэглэгчдийн өдөр тутам авч хүнсэндээ хэрэглэдэг бүтээгдэхүүнүүд орж байгаа юм. Тодруулбал,

Зөрчил 1:  Өчигдөр л гэхэд Сүхбаатар дүүргийн XV хорооны нутаг, Дамбадаржаад байрлах “Миний зах” сүлжээ дэлгүүрт зарагдаж байсан “Сайра” нэрийн лаазалсан загасыг иргэн М 1200 төгрөгөөр худалдан авсан байгаа.  Гэртээ ороод задлаад үзэхэд дотроос нь арзагнасан өт гарч иржээ. Тэрбээр энэ тухайгаа дэлгүүрийн худалдагч нарт хэлж, хорио цээрийн бичгийг нь үзүүлэхийг шаарджээ. Гэтэл 2013 оны дөрөвдүгээр сарын 30-нд 17 тонн “Сайра” нэрийн бүтээгдэхүүн орж ирсэн байсан гэх баримт уг бичигт нь тусгагджээ. Улмаар тэрээр яаралтай холбогдох хүмүүс болоод олон нийтэд мэдэгдэх нь зүйтэй хэмээн үзэж өчигдөр хэвлэл мэдээллээр буюу сайтуудаар энэ тухайгаа дэлгэж эхэлсэн байгаа.   Тухайн иргэн өөрийнхөө авсан загасыг орхилоо гэж бодоход цаана нь ганц хоёр ширхэг биш 17 тонн бүтээгдэхүүн орон даяар тараагдсан байгаа юм. Иргэн М тус дэлгүүрээр байнга үйлчлүүлдэг бөгөөд тухайн үед  “Миний зах”-ын менежер, зохион байгуулагч нарыг дуудахад “Үйлдвэрлэлийн алдаа байх” гэсэн хачин тайлбарыг өгчээ. "Миний зах", "Миний дэлгүүр"-үүдийн иймэрхүү хариуцлагагүй байдал ганц хоёр зүйлээр ч дуусахгүй юм.

Зөрчил 2: “Витафит” ХХК-ийн бүтээгдэхүүний чанартай холбоотой гомдол тасрахаа болих нь ээ. Учир нь өнгөрсөн оны арваннэгдүгээр сарын 20-доор  “Витафит”  компаний “Гоё” жүүснээс мөөгөнцөр гарч  шуугиан тарьж байлаа. Иргэн Ганбат нь “Оргил” худалдааны төвөөс худалдаж авсан “Витафит” группийн үйлдвэрлэсэн ногоон чавганы шүүсэнд тунадас үүссэн тухай бичлэгийг ил болгож байсан удаатай. Үүнийг  Витафит компанийн  зүгээс “Хадгалалт, тээвэрлэлтийн горим алдсанаас  үүссэн байж болзошгүй.  Учир нь үйлдвэрлэлийн явцад тунадас үүсэх ямар ч боломжгүй” гэсэн тайлбарыг хийж байв.

 Гэвч  “Витафит” -ын бүтээгдэхүүнтэй холбоотой гомдол дахин гарлаа.  Иргэн Амгаланбаатар тус компанийн  “Био” жүүснээс авч уух үед гадуураа мөөгөнцөрдсөн зөөлөн эд гарч ирсэн байна. Тэрээр хэрэглэгчдийн эрх ашгийг хамгаалах нийгэмлэг, Мэргэжлийн хяналтын газар зэрэг холбогдох байгууллагуудад хандахаар болжээ.

Зөрчил 3:  Бүх зүйл нь " Сооl" гээд л сурталчилаад байдаг " Сооl" жүүс тараа таниулаад эхэлсэн билээ.  "Бодлын тэмдэглэл" анхны жиргээ ном гаргасан Ж.Бадамдорж ундаанаас цаас гарч ирснийг дэлгэн харуулсаныг олон нийт санаж байгаа бизээ. Тэрээр "COOL жүүс дотроос цаас гарч ирлээ. Битүү савлагаатай болохоор хүн шууд уудаг. Би жүүсээ аваад шилэн саванд хийж дотор нь юу байгааг хардаг юм л даа. Тэгээд хартал тунадас маягийн юм ёроол хавиар байхаар нь савхаар гаргаж амталж үзтэл цаас байх юм. Ингэж ер нь болох уу? Бусдад сургамж болгох үүднээс твиттер хуудсандаа дэлгэлээ" гэсэн юм. “Cool” жүүс бол үндэсний манлай үйлдвэр гэх тодотголтой “Сүү” ХК-ийн бүтээгдэхүүн юм.

Зөрчил 4:  Мөн л Хүнсний манлай үйлдвэрлэгч хэмээн нэрийддэг "Атар Өргөө" компанийн бүтээгдэхүүнээс хүний шүд гарсан гэх мэдээлэл тархсан.  Тодруулбал Дархан хотод борлуулагдсан "Гэрийн боорцог" бүтээгдэхүүнээс нь  хүний шүд гарч ирж олныг цочроосон билээ. Хөдөө орон нутаг, хотод гэлтгүй нэг үйлдвээр гарч буй бүтээгдэхүүнүүдээ нийлүүлдэг баймаар юм. Тэгэхээр та бидний өдөр тутамдаа хэрэглэж байгаа гэрийн боорцогноос  юу ч гарч ирэхийг үгүйсгэхгүй юм.

Зөрчил 5:  Манай үндэсний манлай үйлдвэрүүдийн нэг бол “Талх чихэр” компанийн “Зууван чех” талхны дундаас парлон гарч ирж байсан.  Хэрэглэгч талхыг хүнсний нэг дэлгүүрээс худалдан авсан бөгөөд  ийм сонин үзэгдэл гарсан тул зургийг нь  өөрийн цахим хуудаснаа нийтэлжээ. Идэж  буй талхнаас парлон гарч ирнэ гэдэг үнэхээр байж боломгүй зүйл.

Түүнчлэн он гарахын өмнөхөн  "Sky" худалдааны төвөөс худалдан авсан чихэрнээс өт гарсан талаар нэгэн хэрэглэгч мэдээлж байсан. Тэрбээр өттэй чихрийг ХУД-ийн Скай худалдааны төвөөс авсан байна. Энэ чихэр кг нь 25000 төгрөгийн үнэтэй чихэр аж. Гэтэл дотроос нь өт гарч ирснийг тэрээр олон нийтэд дэлгэсэн билээ.

Энэ мэт хүн нүдээрээ харж байж л итгэхээр санаанд оромгүй зөрчил дутагдлууд илэрч байгаа энэхүү бүтээгдэхүүнүүд дээр хяналт тавих цаг нь болжээ. О.Магнай даргын дараагийн шалгах байгууллагын нэгээр талх нарийн боовны үйлдвэрүүд, ундаа жүүсний компаниуд тодорч байгаа нь лавтай биз ээ.