Ашигт малтмалын тухай хууль, стратегийн ордыг цэгцлэх асуудлыг ойрын өдрүүдэд УИХ-ын чуулганаар хэлэлцэхээр төлөвлөөд байгаа билээ. Энэ үеэр Өмнөговь аймагт 29 лиценз эзэмшдэг “SouthGobi Sand” компани хувьцааныхаа 74 хувийг Хятадын Засгийн газрын мэдэлд байдаг “Чалко” компанид зарсан нь олны анхаарлыг татаад байгаа. УИХ-ын зарим гишүүд ч Засгийн газарт мэдэгдэлгүйгээр Монголын баялагийг гадныхан наймаалцаж байгааг эсэргүүцэж мэдэгдэл хийсээр байна.Өнөөдөр Монголын хэдэн ордын хувьцааг хэн эзэмшдэг, хаана арилжаалагдаж байгаа талаар нэгдсэн мэдээлэл Сангийн яаманд ч байхгүй байгаа юм. 2007 оноос хойш хуулийн дагуу судалгаа хийх цаг хугацаа, боломж байхад Засгийн газрын зүгээс нэг ч тайлан, мэдээлэл ирүүлээгүй байгаа аж. Стратегийн ордуудыг тогтох судалгааны ажлыг хэн хариуцах талаар ч мөн тогтоогүй байгаа юм. Засгийн газрын хурлаар ямар албан тушаалтанд энэ ажлыг хариуцуулах талаар хэлэлцүүлэх гэсэн ч “улс төрийн асуудал” гээд хойшлуулсан байна. Мөн гадаадын хөрөнгө оруулагчидад ашигт малтмалын лицензийг замбараагүй зарсан хариуцлага ч Засгийн газар дээр бууж байгааг АН-ын гишүүд хэлж байна.
УИХ-ын гишүүн Д.Ганхуяг “УИХ стратегийн ордыг төр ашиглах талаар бүх боломжит хууль, тогтоомжийг гаргасан. Харин Засгийн газар хэрэгжүүлэхгүй байна” гэлээ. Харин УИХ-ын гишүүн С.Эрдэнэ “Анх Ашигт малтмалын тухай хуульд гадаадын хөрөнгө оруулагчдыг татах заалтууд оруулж байсан. Одоо монголчууд өөрсдөө боломжтой болсон тул хуулиа зайлшгүй өөрчлөх шаардлагатай болсон” гэв. Энэ дагуу УИХ-ын гишүүн С.Бямбацогт, Д.Ганхуяг нар стратегийн ордод гадны хөрөнгө оруулагчид эзэмших хувь нь 15-аас дээшгүй хувь байх босго тогтоох тухай хуулийн төсөл санаачилсан байна. Стратегийн ордуудын төр эзэмших хувь болон гадаадын хөрөнгө оруулагчдын эзэмших хувийг яаралтай тогтоож өгөхгүй бол хуулийн цоорхой ашиглаж байгаа үйлдэл “SouthGobi Sand” -ээс эхлээд олон байгааг АН-ын гишүүд хэлж байлаа. Дээрх саналыг АН дэмжсэн тул ойрын хугацаанд байнгын хороо, УИХ-ын нэгдсэн чуулганд оруулахаар бэлдэж байгаа аж.
