МАХН-МҮАН-ын "Шудрага ёс" эвслийн бүлэг уржигдар орой хуралдсан. Хуралдаанаар эвслийнхэн сонгуульд хэрхэн оролцох талаараа ярилцана гэсэн мэдээлэл байсан. Мөн МАХН, МҮАН-ын эв нэгдлийн асуудлыг хэлэлцэж магадгүй гэсэн таамаглал ч байсан билээ. Гэсэн ч тус бүлгийн гишүүд "Эдгээр асуудлыг огт хөндөөгүй. Харин Монгол улсын 2012 оны төсвийн тэслийн талаар хэлэлцсэн" гэж мэдээлсэн юм. Түүнчлэн "Шудрага ёс" эвслийнхэн "Эвсэл задрах тухай асуудал байхгүй. Энэ талаар бүлгийн хуралдаан дээр хэлэлцэх шаардлагагүй. Ц.Цолмон гишүүн МАХН-д элссэнтэй холбоотойгоор "Эвсэл тарж магадгүй" гэсэн мэдээлэл гарч, түүнийг хэвлэлийнхэн, улстөрчид дэвэргэж байна" гэж байсан юм. Хэрвээ эвсэл задарвал МАХН-МҮАН-аас жагсаалтаар сонгогдсон гишүүдийг эргүүлэн татах ёстой гэсэн  үндэслэлийг зарим хүн дэвшүүлж байгаа юм байна.