УИХ-ын гишүүд чуулганы хуралдаанд оролцохгүй ирцийн бойкот хийснээр парламентын үйл ажиллагаа тасалдахад хүрээд байгаа. У.Хүрэлсүхийн тэргүүлж буй Засгийн газрын Ерөнхий сайдаас бусад бүх гишүүнийг УИХ-ын гишүүд бүрдүүлж байгаа. Засгийн газрыг огцруулах эсэхийг хэлэлцсэнээс хойш нэг ч удаа чуулган хуралдаж чадаагүй байгаа нь сайд гишүүд ирцийн бойкотыг дэмжиж байгаатай холбоотой. Улс төрийн энэ тодорхойгүй байдал өмнөх парламентын үед Ц.Элбэгдорж Ерөнхийлөгчийн санаачлаад байсан давхар дээлний тухай хуулийн яриаг дахин сэргээхэд хүрч байна. Учир нь, УИХ-ын гишүүн сайд болдог нь УИХ-ын өмнө ажлаа хариуцдаг, УИХ-аар орж танхимаа бүрдүүлдэг Засгийн газрын эрэмбийг алдуулж буй юм. Одоогийн өрнөөд байгаа үйл явцаас харахад УИХ-ын дээр Засгийн газар суучихаад байгаа юм. Улс төрд өрнөөд байгаа энэхүү тодорхойгүй байдлын талаар улстөрчид хийгээд хуульчид үгээ хэлж байгаа. Монгол Улсын дөрөв дэхь Ерөнхийлөгч Ц.Элбэгдорж ч мөн “Мөнхтөрийн цаг”-аар ярилцлагад орохдоо энэ талаар тодорхой өгүүлсэн. Тэрбээр, “Ерөнхий сайдаас бусад Засгийн газрын гишүүдийг парламентын гишүүнээр бүрдүүлдэггүй байх хэрэгтэй. Энэ хуулийг баталж байж л одоогийнх шиг ийм ойлгомжгүй нөхцөл байдал үүсэхээс сэргийлж чадна. Хэрвээ Ерөнхий сайдаас бусад сайд нарыг парламентын гаднаас томилдог болчихвол УИХ дуудахад бүү хэл ганцхан гишүүн дуудахад л Засгийн газар парламентын өмнө ирдэг болно” хэмээсэн юм. Ерөнхийлөгч асан Ц.Элбэгдоржийн санаачилсан давхар дээлийн хуулийн төслийг тухайн үеийн сөрөг хүчин, одоогийн эрх баригч МАН-ынхан дэмжиж, жагсаал хүртэл хийж байсан билээ.
С.Нацаг
Сэтгэгдэл (54)