Төр, нийгмийн зүтгэлтэн С.Зориг агсны амь насыг хөнөөсөн хэргээр ял эдлэж буй Т.Чимгээ Б.Содномдаржаа нарыг эрүүдэн шүүсэн, гүйцэтгэсэн ажлын журам зөрчсөн гэх хэрэг холбогдоод буй Б.Хурц нарт холбогдох хэргийн шүүх хурал Төв аймаг дахь Эрүүгийн хэргийн анхан шатны шүүхэд болж байна. Тус шүүх хуралд ажиглагчаар оролцох хүсэлтээ Түр хорооны гишүүн энэ сарын 12-нд гаргасан юм.

Шүүх бүрэлдэхүүн уг хүсэлтийг дөнгөж сая хэлэлцээд татгалзсан байна.

Шүүхээс ийм шийдвэр гаргасан үндэслэл нь эрүүгийн хэрэг хянан шийдвэрлэх ажиллагаанд улстөрчид хөндлөнгөөс нөлөөлөх эрсдэлтэй, шүүх процессийн үед улсын нууцтай асуудал яригдах учир нууцын зэрэглэлд сөргөөр нөлөөлөх, цаашлаад Эрүүгийн хэрэг хянан шийдвэрлэх тухай хуульд тухайн шүүх хуралд “Ажиглагчаар” оролцох гэсэн утга тусгагдаагүйтэй холбоотой бололтой гэдгийг эх сурвалж мэдээллээ. 

Тодруулбал, Түр хорооны гишүүд болох түр хорооны даргаар Ж.Батзандан, гишүүнээр Хууль зүй, дотоод хэргийн сайд Ц.Нямдорж, УИХ-ын гишүүн Х.Нямбаатар, Я.Санжмятав, Л.Болд, А.Сүхбат,  Ө.Энхтүвшин нар хаалттай шүүх хуралд ажиглагчаар оролцох хүсэлт гаргаад байсан юм.

Г.Эрдэнэ