"Өгөөмөр" захыг хаа эсвэл иргэд тэмцэнэ гэдгийг Баянзүрх дүүргийн 14 дүгээр хорооны оршин суугчдын төлөөлөл өнөөдөр мэдэгдлээ. Тодруулбал, “Өгөөмөр” захын ард дахин төлөвлөлтөөр баригдсан орон сууцанд 10 мянган иргэн амьдардаг аж. Гэтэл "Өгөөмөр" захын “буруутай” үйлдлээс болж ойр орчмын хотхоны иргэд гэртээ орж чадахаа больжээ.

Учир нь тус захын газар эзэмших эрхийн хугацаа дууссаны дараа эрх сунгуулахдаа хотхон руу ордог байсан нийтийн эзэмшлийн зам, талбайн газрыг хамруулж, талбайн хэмжээгээ сунган авчээ. Үүний улмаас иргэд гэртээ орох боломжгүй болсон учир Нарантуул захаар тойрч орохоос өөр аргагүй болсон байна. Тиймээс уг орц гарцыг нээж өгөхийг Нийслэлийн Засаг дарга С.Амарсайханаас иргэд хүслээ.

Иргэдийн хэлснээр 2015 онд нийслэлийн автозамын хөдөлгөөнийг бууруулах үүднээс "Өгөөмөр" захын авто худалдааны төвийн ард 0.4 км автозам байгуулахаар нийслэлээс төлөвлөсөн байна. Үүний дараа урд талын замыг "Өгөөмөр" захын хажуугаар гаргаж, Нарны замтай, хойд талын замыг Цагаанхуарангийн замтай холбож өгнө гэж хотхоны хашааг буулгажээ. Гэтэл төд удалгүй "Өгөөмөр" захаас уг газрыг битүүмжилж, 500 төгрөгөөр машин оруулдаг төлбөртэй хэсэг болгосон байна.

Нарантуул захын ард барьсан автозам нь өнөөдрийг хүртэл дуусаагүйн дээр хамгийн гол галын болон түргэн тусламжийн тэрэг орох боломжгүй мухар гудамтай замтай болжээ. Энэ талаар нийслэлийн холбогдох байгууллагад удаа дараа хүсэлт гаргасан боловч тодорхой шийдвэр гараагүй байна. Сургууль, цэцэрлэгийн үйл ажиллагаа эхэлсэн. Дээр нь "Өгөөмөр" захыг зорих иргэдийн ачааллаас болж дээрх 10 мянган ирэн гэртээ орохын тулд 2-3 цаг түгжирч байгаа аж.  

Түүнчлэн дахин төлөвлөлтийн хоосон хашаан дотор иргэдээс мөнгө авч, автомашин засвар үйлчилгээ хийхийн зэрэгцээ тос, маслог хяналтгүй асгах байдал газар авчээ. Үүнээс болж хөрсний бохирдол маш их болсон нь мэргэжлийн хяналтын шалгалтаар тогтоогдсон байна. Мөн хороолол дундах автозамаар 3.5 тонноос дээшгүй автомашин явах ёсгүй. Гэтэл 20 тоннын автомашин явдаг болсноос болж хотхоны дундах автозам бүгд эвдэрчээ.

Тиймээс "Өгөөмөр" захын арын хаалгыг нээлгэж, Нарны автозамтай холбох ажлыг хийхийг иргэд шаардаж, "Хэрвээ энэ замыг нээхгүй бол "Өгөөмөр" захын үйл ажиллагааг зогсоохоор оршин суугчид жагсана" гэдгээ хэллээ.