АТГ-аас ээлжит хурлаа өнөөдөр хийлээ. Энэ үеэр АТГ-ын Олон нийттэй харилцах асуудал хариуцсан ахлах мэргэжилтэн А.Баярхүү сэтгүүлчдийн сонирхсон асуултад хариулт өгсөн юм.  

-АТГ авлигатай тэмцэн ажиллаад байхад гэмт хэрэг үйлдэгдсээр байна. Гаалийн байцаагчдаас гадна хэчнээн төрийн албан хаагч шалгагдаж байна вэ?

-Тодорхой хэргүүдийн талаар өмнөх жилүүдэд их ярьсан. Ер нь албан тушаалаа урвуулан ашиглаж авлига авсан хамгийн том жишээ бол ЖДҮХС-гийн зээлийн асуудал. Тухайн үед зээлийн ил тод байдал хангагдахгүй байна гэсэн зөвлөмж хүргүүлсээр байтал уг гэмт хэрэг гарах нөхцөлийг бүрдүүлсэн. Албан тушаалтантай холбоотой тодорхой төрлийн хэргүүд бий. Яг ийм тийм гэж хэлэх боломжгүй.

-АТГ салбар дээр төвлөрч судалгаа хийдэг. Аль салбарт авлига их байна вэ?

-АТГ-д ирүүлж байгаа өргөдөл, гомдол дунд эрүүл мэнд, боловсролын асуудал их гардаг. Салбаруудын хамрах хүрээ нь их өргөн.

-НОСК-ийн ажилчид хахууль авсан гэх асуудлын талаар тодорхой мэдээлэл өгнө үү?

-НОСК-д хэрэг бүртгэлийн хэрэг нээн шалгаж байгаа. Тухайн байгууллагад ажилладаггүй албан тушаалтнууд тухайн системд нэвтэрч бусдаас мөнгө авсан, залилан мэхэлсэн нь тогтоогдсон. Уг хэргийг харьяаллын дагуу цагдаагийн байгууллагад шилжүүлэн шалгуулж байна.

-НОСК-д ажилладаггүй хүн системд нэвтэрч залилсан гэдгээ тодруулна уу?

-Уг хэрэгт хэрэг бүртгэлийн хэрэг нээн шалгаж байгаа. Тиймээс тодорхой этгээдийн нэр зааж яллагдагчаар татаагүй байна.

-Авлига, албан тушаалын хэрэгт холбогдсон 17 шүүгчийн бүрэн эрхийг түдгэлзүүлж шалгаж байгаа. Харин С.Төмөрбат шүүгч гадагшаа гарсан гэсэн мэдээлэл бий. Түүнийг яаж Монголд эргүүлэн авчрах юм бэ?

-Салхитын мөнгөний ордтой холбоотой гэж яригддаг шүүгч нартай холбоотой хэргийг шалгахын тулд тухайн шүүгчийн бүрэн эрхийг түдгэлзүүлсэн. Яг үүнтэй зэрэгцэн шүүгчээр ажиллаж байсан С.Төмөрбат нь ОХУ-аар дамжин АНУ руу явсан гэсэн мэдээллийг авсан. Холбогдох журмын дагуу эргүүлэн авчирахаар ажиллаж байна.

-Говь-Алтай аймгийн Засаг даргад холбогдох хэргийг шалгаж байгаа гэсэн. Тухайлбал, их хэмжээний мөнгө оруулж, гаргасан, улсын мөнгийг зориулалтын бусаар ашигласан зэрэг асуудал яригдаж байна. Энэ талаар мэдээлэл өгнө үү?

-Энэ талаар мэдээлэл өгөх боломжгүй.

-Хэргүүдийг нэмэлт мөрдөн байцаалтад буцаасан гэж байна. 2015 онд батлагдсан Эрүүгийн хуулиар хэргийг буцаахгүй байхаар зүйл заалт оруулсан гэсэн. Нэмэлт, өөрчлөлт оруулахдаа хаячихав уу, эсвэл батлахдаа энэ зүйл заалтыг оруулаагүй юм уу?

-Урьдчилсан хэлэлцүүлгийн явцад мөрдөн байцаалтад буцаагаад байгаа гэсэн үг.

-Ерөнхий сайдаар ажиллаж байсан С.Баяр, Ч.Сайханбилэг болон Сангийн сайдаар ажиллаж байсан С.Баярцогт нарт холбогдох хэрэг шүүхэд шилжих гэж байгаа тухай мэдээлэл байна. Энэ талаар мэдээлэл өгнө үү?

-Дээрх нэр бүхий төрийн өндөр албан тушаал хашиж байсан этгээдүүдэд холбогдох Оюутолгойн гэрээтэй холбоотой хэргийн мөрдөн шалгах ажиллагаа дууссан. Хэргийн цар хүрээ өргөн учраас уг хэрэгт холбогдогч нарт хэргийн материалыг танилцуулна. Танилцуулж дуусмагц шүүхэд шилжинэ.

-Эрүүл мэндийн сайд Д.Сарангэрэлийн хүү Худалдан авах ажиллагааны газрын даргаар ажилладаг. Түүний найз Тээврийн Цагдаагийн албанд мөрдөгчөөр ажилладаг юм байна. Тендер авах асуудлаар 125 сая төгрөгийн авлига өгсөн асуудлаар АТГ-д иргэн мэдээлсэн гэсэн. Уг хэрэг ямар шатанд явж байна вэ?

-Уг хэрэгт хэрэг бүртгэлийн хэрэг нээн шалгаж байна.

Б.Лхам