Нийслэлийн МАХН-ын дарга Э.Эрдэнэжамъяан ойрмогхон мэдэгдэл хийж, аархах болов. Хэвлэлийн бага хурал хийх үеэрээ, хүн бүрийн хэрэглээ болсон сошиал орчинд ч түүнийгээ ил тод зарлаж байна. УИХ-ын ээлжит сонгуульд Арчдилсан нам ялалт байгуулж, МАХН-МҮАН-ын “Шударга ёс” эвслийг түшиглэн байгуулсан Засгийн газарт Хууль зүйн сайдаар нь Х.Тэмүүжин очиход орлогчоор нь очсон даруйдаа тэрбээр МАХН-ын дарга Н.Энхбаярын хэрэгт холбогдуулж Интерполын ерөнхий нарийн бичгийн даргын газарт “Монгол Улсын Интерполын үндэсний товчооноос илгээсэн мэдээллийн дагуу олон улсын хэмжээнд эрэн сурвалжлагдаж байгаа Б.Хуяг, Н.Энхтуяа нарыг олон улсын хэмжээнд эрэн сурвалжлах ажиллагааг зогсоож өгөөч” гэсэн утгатай и-мэйл буюу цахим шуудан илгээж шуугиан тарьж байсан удаатай. Өөртэй нь холбоотой мэдээллийг үгүйсгэх үеэрээ нулимсаа “нуугаагүй”.

Харин парламентад ганцхан суудалтай буюу О.Баасанхүү гишүүнээр МАХН-ыг төлөөлүүлэх болсон энэ үед Э.Эрдэнэжамъяан нийслэлийн МАХН-ын даргын хувиар аархах боллоо.

Ингэхдээ “МАХН эрх баригч болно. 2020 оноос эхлэн ипотекийн зээлийг тэг хувийн хүүтэй болгоно. Шинээр орох хүмүүсийг тийм зарчмаар оруулна. Өмнөх орсон хүмүүсийн төлсөн хүүг үндсэн төлбөрт тооцно. Барилгын салбар тэлнэ. Банкууд эрүүлжинэ. Хүмүүс аз жаргалтай болно. Win win” хэмээсэн нь түүнийг чиглэсэн шүүмжлэлийн галыг улам өрдөж байх шиг. Тэгэх нь ч аргагүй.  

Үүнээс өмнө, бүр тодруулбал, УИХ-ын гишүүн асан Д.Гантулгын сонгогдсон 42 дугаар тойрогт нөхөн сонгууль болох эсэх чимээ гарах үеэр МАХН-ын дэд дарга С.Ганбаатар “Уул уурхайн баялгаа хулгайгүй болгоё. Ингэснээрээ дээд боловсролоо үнэгүй болгоё, орон сууцаа үнэгүй олгох бүрэн боломжтой. Цалинг таван сая болгоно. Монголчууд Норвегиос илүү баялагтай. Гэтэл тэр улс иргэдээ үнэгүй орон сууцаар хангаж, залуучуудаа дэмжиж байна. Монголд бол Оюутолгой, Тавантолгойн баялгаа гадныханд үнэгүй өгч, иргэдээ ядуу зүдүү, ажилгүй болгож байгааг харахаар сэтгэхүйн гажигтай хүн шиг харагдаад байна. Ийм байдлыг бид таслан зогсооно” хэмээн сонгогчидтой уулзалт хийх үеэрээ нэг бус удаа тодотгож байв. Араас нь олон арван шүүмжлэл, эгдүүцэл түүнийг дагасан.

Хачирхалтай нь, нийслэлийн МАХН-ын даргын үүрэгт ажилтай Э.Эрдэнэжамъяан ирэх сонгуулиар нам нь эрх баригч болох хэмжээний ялалт байгуулах тухай “зарласан” нь олон хүний эгдүүцлийг төрүүлэв.

Цаашлаад иргэдэд хамгийн хамааралтай, заримынх нь эмзэг цэг болсон ипотекийн зээлийг хүүг тэг болгох нь МАХН-ын сонгуулийн ТУГ гэдгийг тэрбээр ил тод хэлсэн нь энэ байв. Гэхдээ Э.Эрдэнэжамъяан даргын “аархал”-д дөрөөлсөн сонгуулийн амлалт нь биелэх, хэрэгжүүлэх боломжтой юу гэдэг нь өөрөө эргэлзээтэй. Биелэх магадлал нь тун хомс. Эдийн засгийн хэмжээ хязгаар нь ч хүрэхгүй. Тэгээд ч 2021 оноос эхлэн дараалсан бондуудын өрийг хэрхэн төлөх нь шинээр эмхлэгдэх Засгийн газар, парламентын үүрэг. Ард түмэн ч сонгуулийн элдэв амлалт, мөрийн хөтөлбөрт итгэхээ больсон цаг. Тэгэхээр нийслэлийн МАХН-ын дарга Э.Эрдэнэжамъяангийн “аархал” зүгээр л хий хоосон амлалт, хөөс төдий юм.

С.Сүлд