"Оюутолгой"-н Хөрөнгө оруулалтын гэрээ, Хувь нийлүүлэгчдийн гэрээ, Дубайн гэрээг батлахдаа эрх мэдэл, албан тушаалын байдлаа урвуулан ашиглаж, бусдад давуу байдал бий болгон улсад их хэмжээний хохирол учруулсан байж болзошгүй хэргээр Ерөнхий сайд асан С.Баяр, Ч.Сайханбилэг болон УИХ-ын гишүүн, Сангийн сайд асан С.Баярцогт, Татварын ерөнхий газрын дарга асан Б.Ариунсан, "Эрдэнэс Монгол" ХХК-ийн гүйцэтгэх захирал асан Б.Бямбасайхан нарыг АТГ-аас шалгаж байгаа билээ.

Ерөнхий сайд асан С.Баяр, Ч.Сайханбилэг нарыг АТГ-ын Мөрдөн шалгах хэлтэс эрүүгийн хэрэг үүсгэн шалгаж эхэлсэний дараа буюу өнгөрсөн 2018 оны дөрөвдүгээр сард баривчилж, ШШГЕГ-ын харьяа хорих 461 дүгээр ангид цагдан хорьсон. Үүний дараа цагдан хориог үргэлжлүүлэх саналыг  прокурорын газраас хүсэлт гаргасны дагуу нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхээс тэднийг үргэлжлүүлэн 30 хоног хорих шийдвэр гаргасан байдаг.

Уг шүүх хуралд Ерөнхий сайд асан С.Баяр онлайнаар холбогдож, тайлбар мэдүүлэг өгсөн юм.

Үүний дараа буюу 2018 оны тавдугаар сард болсон шүүх хурлаар тэднийг үргэлжүүлэн хорих шаардлагагүй гэж үзэн, зөвхөн хилийн хориг тавих шийдвэр гаргасан.

Тэгвэл Экс Ерөнхий сайдуудад холбогдох хэргийн мөрдөн байцаалтын ажиллагаа дууссан бөгөөд хэргийг яллах саналтайгаар прокурорт шилжүүлсэн байна. Прокуророос хэргийг шүүхэд шилжүүлбэл дээрх иргэдийн гэм буруутай эсэхийг тогтоох шүүх хурлын товыг гаргах юм. 

Г.Эрдэнэ