Барилга, хот байгуулалтын сайд асан З.Баянсэлэнгийг саатуулжээ. З.Баянсэлэнгэ, М.Болортуяа нарт холбогдох хэргийн шүүх хурал өнөөдөр болох байсан ч энэ сарын 28-ныг хүртэл хойшлуулсан юм. Тодруулбал, Нийслэлийн прокурорын газраас нэр бүхий хүмүүсийг 2002 оны Эрүүгийн хуулийн тусгай ангийн 263.2 дахь хэсэгт зааснаар албаны эрх мэдэл буюу албан тушаалын байдлаа урвуулан ашигласан хэргээр шалгаж ийнхүү хэргийг нь шүүх рүү шилжүүлсэн байдаг.

Учир нь, З.Баянсэлэнгэ  Барилга, хот байгуулалтын сайдаар ажиллаж байхдаа албан тушаалын байдлаа урвуулан ашиглаж "Бэрэн групп" ХХК-ийн барьсан "Хангай" хотхоны орон сууцнаас 123 айлын орон сууцыг тендер зарлалгүйгээр худалдан авч, улсын төсөвт 972.4 сая төгрөгийн хохирол учруулсан байж болзошгүй гэх асуудлаар Авлигатай тэмцэх газраас шалгаж эхэлсэн билээ. 

Гэвч сайд асан З.Баянсэлэнгэ нь шүүх бүрэлдэхүүнээс татгалзаж, өмгөөлөгчөө сольсон хүсэлтийг нь хүлээн аваад байсан юм. Харин тэрбээр энэ удаад дүүргийн шүүхээс татгалзсаныг хэрэг хянан шийдвэрлэх ажиллагаанд саад учруулна гэж үзэн таслан сэргийлэх арга хэмжээ авсан бололтой. 

С.Сүлд