“Налайхын замыг энэ сарын 29-нд буюу маргааш нээнэ” гэдгийг хотын дарга С.Амарсайхан хэлжээ. Тийш чиглэсэн, чиглэдэг, ажил, амьдралаа зохицуулдаг хүн бүрийн хувьд сайхан үг. Гэрэл, гэгээтэй мэдээлэл. ГЭТЭЛ... Сайны хажуугаар саар гэгч байдаг аж. Тэр нь Улаанбаатар-Дархан чиглэлийн 204.11 километр замын ажлыг үндсэн таван компани, 10 гаруй туслан гүйцэтгэх компани хариуцаж авчээ. Бараг адилхан хугацаанд эхэлсэн ажил, бүтээн байгуулалт. Ерөнхий сайд, Зам, тээвэр хөгжлийн сайд, холбогдох агентлаг, газрын дарга нарын хэлсэн үгээр энэ зам өдийд хучилтаа хийгээд хүн, ардыг аюулгүй зорчих нөхцөлийг нь түрүүчээсээ бүрдүүлж, суурийг нь тавих байв. Улаанбаатар-Налайхын замаар жишээ татахад шүү дээ.
Хачирхалтай нь, уг замын тендерийг шалгаруулсны дараа нэгэн “Но” илэрчээ. Мэдээж тендерийн шалгаруулалт ил тод байсан байж таарна. Гэтэл буух эзэн, буцах хаяггүй тендерийн шалгаруулалт явсан бололтой. Үүнийг салбарын сайд Б.Энх-Амгалан илүү сайн мэдэж таарна. Тендерт шалгарагсад буюу хариуцсан компаниуд нь дуншиж, дуншиж, иргэдийг, жолооч нарыг наагуур, цаагуур явуулсаар өнөөдрийг хүрсэн. Түүгээр зорчиж, үүгээр ярьсан хүмүүс үүнийг бүгдээрээ мэдэж байна.
Автозамын барилгын ажил гэдэг хамгийн хариуцлагатай, чанартай ажил. Учир нь, өөрсдийн амь нас, эрүүл мэнд түүгээр зорчиж буй хүн бүр, жолоочид хамаардаг. Гэвч уг замын шинэчлэлийг хариуцаж буй холбоотой мэдээлэл ойр ойрхон ирэх боллоо. Тэр нь Хятадын хөрөнгө оруулалттай “China State Construction Еngineering Group” хэмээх компани.
“Хар модот” даваанаас Урьхан хүртэлх 45 км, Сүмбэрийн уулзвараас Цайдамын хөндий хүртэлх 45.08 км авто замын ажил гээд нийт 90,8 км замын ажлын тендерт тус компани шалгарч ажлаа эхлүүлжээ. Туршлагаас нь харахад туршлагатай ч, Монголын автозам дагасан бүтээн байгуулалтад тавьж буй зам шигээ “бараан” түүхийг цутгаж эхэлсэн байх юм. Ганцхан жишээ дурдахад “Манай ажил төлөвлөсний дагуу амжилттай хэвийн үргэлжилж байна. Автозамыг хугацаандаа хүлээлгэж өгнө. Гадуур яваад байгаа элдвийн цуу яриа бол огт худал мэдээлэл. Бид энэ талын арвин туршлагатай компани тул санаа зовох явдалгүй” хэмээн “China State Construction Еngineering Group” компанийн төслийн удирдагч саяхан тайлбар өгчээ.
Тэдний хэлснээр Дархан чиглэлийн автозам-ын бүтээн байгуулалт “ногоон гэрэл”-ээр урагшилж буй мэт. Ачир дээрээ тэнд ажиллаж байгаа монгол ажилчдад цалингаа цагт нь тавьдаггүйгээс эхлээд энэ компанид асуудал их байна. Цалин хөлсөө нэхсэн нэгнийг нь бүр зодож дарамталдаг тухай яриа цахим орчинд хөврөх болов. Тэр тусмаа “China State Construction Еngineering Group” компанитай холбоотой.
Нэг үгээр, Тавантолгойн уурхайгаас Гашуунсухайт, Ганцмодны боомт хүртэл нүүрс тээвэрлэдэг монголчуудын дарамт, түүнээс баруун хязгаар хүртэл халдварлаж, хэдэн зуун км хүртэл үргэлжлэн зам барилга хүрчээ. Эндээс нэг асуулт гарч ирнэ. Улаанбаатар-Дархан чиглэлийн автозамын бүтээн байгуулалтыг хийхэд “China State Construction Еngineering Group” чухам яагаад шалгарав?. Хуулийн дагуу шалгарсан бол яагаад ажилчдынхаа цалин өгөхгүй луу унжив?. Хамгийн гол нь, ажилласан цагийнхаа хөлсийг нэхсэн монгол ажилчдыг яагаад зодож, дарамтлах болов?. “China State Construction Еngineering Group” Монголын хуулийн дээр гишгэлэх шалтгаан бий юу эсвэл хариуцлага тооцох цаг болсон юм биш үү!, Ерөнхий сайд аа!.
Б.Энх-Амгалан сайд ч салбар хариуцсан нэгдүгээр хүний хувьд холбогдох тайлбар өгөх биз ээ!
С.Сүлд
Сэтгэгдэл (6)