Тагнуул, цагдаагийн байгууллагын хамтарсан ажиллагаагаар энэ сарын 29-нд дөрвөн байршлаас гадаадын 500-гаад иргэнийг цахим гэмт хэрэг үйлдсэн байж болзошгүй гэж үзэн саатуулсан билээ. Сүүлд энэ тоо 800 хүрснийг Тагнуулын ерөнхий газрын дарга Д.Гэрэл хэлсэн. “Юнион бюлдинг”, “Ориентал”, “Кентавр”, “Амар” зочид буудалд байрласан эдгээр иргэд бүгдээрээ БНХАУ-ынх, Монголын хилээр орж ирсэн өдрөө дээрх буудалд байрласан байдаг. Энэ хугацаанд байрласан газраасаа гаралгүйгээр цахим гэмт хэрэг үйлдсэн байж болзошгүй хэмээн үзэж байгаа юм байна.

Баривчилгаатай холбогдуулж, Засгийн газрын хуралдаанаар уг асуудлыг хэлэлцэж, тагнуул, цагдаагийн байгууллагын удирдлагууд холбогдох мэдээллийг өгсөн юм.

Цахим гэмт хэрэгт сэжиглэгдэн баривчлагдсан хятад залуус 30 хоногийн жуулчны визтэйгээр манай улсад иржээ. Тэдний олонхи нь БНХАУ-ын Хөх хотод байдаг Монголын Консулын газраас жуулчны виз авсан, цөөхөн хэд нь Эрээний консулын газраас виз авчээ.

Эх сурвалжийн хэлж буйгаар саатуулаад буй албан ёсоор саатуулсан 758 БНХАУ-ын иргэнээс цөөн тооны хүнийг авч үлдээгээд бусдыг нь өнөөдөр албадан гаргахаар болсон байна. Өөрөөр хэлбэл, аяллын визээр орж ирсэн нь цахим, бооцоот тоглоом ажиллуулж байсан нь хөдөлмөр эрхэлсэн гэх үндэслэж болсон бололтой. Тиймээс уг үйл ажиллагааг зохион байгуулсан нэр бүхий иргэнийг үлдээж, бусдыг нь Монгол Улсаас албадан гаргахаар болсон байна.

Тагнуулын ерөнхий газрын дарга Д.Гэрэлийн онцолсноор "Тэдгээр иргэнийг зохион байгуулалтад оруулж, таван зочид буудал ашигласан асуудал гарсан. Урьдчилан хэлэхэд хүний тоо 800 хүрсэн. Дөрвөн хятад, нэг Монгол иргэнийг зохион байгуулагч гэсэн шалтгаанаар шалгаж байгаа. 1000 гаруй компьютер, 10 гаруй гар утасны сим ашиглаж байсан. Энэ асуудал бүрэн хяналтад байгаа. Айдаст автах шаардлагагүй.

Наймдугаар сараас хойш бүрэн хяналтад явж ирсэн асуудал. Үндэсний аюулгүй байдалд нөлөөлөхүйц төвшинд байсан болохоор тагнуулын байгууллагын хяналтад явж ирсэн. Мөнгө угаахтай холбоотой асуудал. Мөнгө угаах асуудал нь тоглоом бусад хэлбэрээр байж болно. Эцсийн шийдвэрийг хараахан гаргаагүй байна.

Одоогоор хураагдсан компьютерийг шалгаж байна. 758 хүнийг шууд хорих боломжгүй. Байршиж байгаа зочид буудалдаа байгаа. Нэр бүхий иргэнийг саатуулан шалгаж байгаа. Наймдугаар сараас хойш 20-30 гэсэн байдлаар жуулчны визээр цувж орж ирсэн байгаа. Жуулчны визээр орж ирээд хөдөлмөр эрхэлсэн тохиолдолд албадан гаргах эрхтэй.

БНХАУ-ын Элчин сайдын яамнаас хамтарч ажиллахаа илэрхийлсэн” гэсэн юм.

Харин Цагдаагийн ерөнхий газрын дарга С.Баатаржав “Хэрэг шалгадаг хуультай учраас хуулийн хүрээнд мөрдөн шалгаж байгаа. бүх мэдээлэл ижил. Цагдаагийн үйл ажиллагаа тусдаа явахгүй. Манай байгууллагын Кибер гэмт хэрэгтэй тэмцэх хэлтэс ажиллаж байна. Үүрэн холбооны зарим оператор компанийг шалгана. Зочид буудлуудад хариуцлага ярина. Эдгээр иргэнийг нутаг буцаана. Цаашдаа хяналт шалгалт үргэлжилнэ. Нэмж илрүүлэх ажиллагааг явуулна. Мөрийтэй, бооцоот тоглоомын үйл ажиллагаа явуулах гэж орж ирсэн байж магадгүй гэж үзсэн” хэмээх тайлбарыг өгөөд байсан юм.

Мөн “Монголын цагдаагийн байгууллагаас Хятад улсын харьяат иргэд Монгол Улсад цахим гэмт хэрэг холбогдсон талаар мэдэгдсэн. Одоогийн байдлаар мөрдөн байцаалт, мэдүүлэг авах шатандаа явагдаж байна. Хятад, Монгол хоёр тал хууль сахиулах, аюулгүй байдлын салбарын хамтын ажиллагааны арга замууд нь нээлттэй байгаа ба талууд энэ хэрэг дээр нягт хамтран ажиллаж байна.

Уг хэрэг хуулийн дагуу шийдэгдэнэ гэдэгт найдаж байна.

БНХАУ-аас Монгол улсад суух Элчин сайдын яам уг хэрэгт цаашид анхаарлаа хандуулсаар байх бөгөөд Монголын талын холбогдох байгууллагуудтай нягт хамтран ажиллах болно” гэдгийг БНХАУ-аас Монгол Улсад суугаа Элчин сайдын яамнаас мэдэгдээд байв.

С.Сүлд