Монгол Улсын Ерөнхийлөгч Х.Баттулга Салхитын мөнгөний ордтой холбогдох хэргийг шүүхдээ авлига авсан байж болзошгүй нэр бүхий 17 шүүгчийн бүрэн эрхийг түдгэлзүүлээд буй. Тэдгээр шүүгчдийн нэг болох Нийслэлийн захиргааны хэргийн анхан шатны шүүхийн шүүгч асан С.Төмөрбат нь ОХУ-аар дамжин АНУ руу гарахдаа их хэмжээний ам.доллартай хил дээр саатуулагдсан байдаг. Тэгвэл түүнийг Монгол Улсад шилжүүлэн авчрахаар АТГ-аас ажиллаж эхэлсэн байна. Шүүгч асан С.Төмөрбат нь Салхитын мөнгөний ордтой холбоотой хэргээр Урьдчилан хорих 461 дүгээр ангид саатуулагдаж байхдаа амиа егүүтгэсэн гавьяат хуульч, шүүгч асан Б-гийн төрсөн хүү юм.

Хэдийгээр АТГ-аас шүүгч асан С.Төмөрбатыг авчрахаар ажиллаж байгаа ч энэ ажилд үр дүн гарах эсэх нь тодорхойгүй. Учир нь манай улс АНУ-тай ялтан шилжүүлэх гэрээ байгуулаагүй нь хүндрэл учруулж болзошгүй. Тодруулбал, манай улс 50 гаруй улстай ялтан солилцох гэрээ байгуулснаас гадна олон улсын конвенцийн хүрээнд ялтан шилжүүлэх үүргийг гэрээгээр хүлээдэг. Харин энэ оны есдүгээр сарын 11-ний Засгийн газрын хуралдаанаар Эрүүгийн ял шийтгэлийг гадаад улсад эдлүүлэх тухай Америкийн Улсууд хоорондын конвенцийг соёрхон батлах тухай хуулийн төслийг дэмжиж, УИХ-д өргөн мэдүүлж, хэлэлцүүлэхээр тогтсон. Хэрвээ энэ конвенцид нэгдвэл АНУ, Канад, Бразил, Мексик зэрэг нийт 21 улсаас ялтан солилцох боломж нээгдэх юм.