Төр, нийгмийн зүтгэлтэн С.Зоригийн амь насыг хөнөөсөн хэргийг илрүүлэх явцдаа эрүүдэн шүүсэн гэх хэргээр яллагдагчаар татагдсан Улсын ерөнхий прокурорын орлогч асан Г.Эрдэнэбат, Тагнуулын ерөнхий газрын дарга асан Б.Хурц тэргүүтэй хүмүүс Дээд шүүхэд ханджээ. Тэдэнд холбогдох хэргийг Төв аймгийн анхан шатны шүүхээс нэмэлт мөрдөн байцаалтад буцаасан байдаг.

Уг шийдвэрийг прокуророос эсэргүүцэж, мөрдөн байцаалтад буцаах шаардлагагүй гэсэн гомдол гаргасныг Төв аймгийн Сум дундын Эрүүгийн хэргийн давж заалдах шатны шүүх хүлээж авсан удаатай. Улмаар нэмэлт мөрдөн байцаалтад буцаах анхан шатны шүүхийн тогтоолыг давж заалдах шатны шүүхээс хүчингүй болгож, хэлэлцүүлэгт буцаах шийдвэр гаргаад байв.

Гэвч энэ шийдвэрийг Б.Хурц, Г.Эрдэнэбат нарын есөн хүн хүлээн зөвшөөрөхгүй гэдгээ илэрхийлж, Дээд шүүхэд өмгөөлөгчдөөрөө дамжуулан гомдол гаргасан бололтой.

С.Сүлд