Шүүхийн шинжилгээний үндэсний хүрээлэнгийн шинжээч эмч Ж.Оюунаа, Х.Түвшин-Эрдэнэ, М.Золжаргал нарыг гэм буруутай эсэхийг хэлэлцэх шүүх хурал  өнөөдөр буюу энэ сарын 10-ний өдрийн  09.00 цагт Сүхбаатар дүүргийн Эрүүгийн хэргийн анхан шатын шүүхэд товлогдоод байсан юм. Тэдэнд холбогдох хэргийн гэм бурууг хэлэлцэх шүүх хурал өмнө нь хоёр удаа хойшлоод байсан бол өнөөдрийн шүүх дахин хойшлов. Учир нь  хохирогч шүүх болон ШШҮХ-ийн лаборант Баттогтох ирээгүй тул шүүх хуралдааныг 2020 оны нэгдүгээр сарын 7-ны өдрийн 09.00 цаг хүртэл хойшлуулсан байна. 

Тэдэнд Эрүүгийн хуулийн 21.4.1, 21.1.2-д зааснаар 

21.4 дүгээр зүйл. Шинжээч зориуд худал дүгнэлт гаргах

1.Шинжээч шүүхийн шийдвэр гүйцэтгэх болон мөрдөн шалгах ажиллагааны үед, шүүхэд үнэн зөв дүгнэлт гаргахаа илэрхийлж, баталгаа гаргасны дараа зориуд худал дүгнэлт гаргасан бол нэг жилээс таван жил хүртэл хугацаагаар эрх хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

21.1 дүгээр зүйл.Нотлох баримтыг хуурамчаар үйлдэх, устгах

2.Энэ гэмт хэргийг хууль сахиулагч, өмгөөлөгч, прокурор, шүүгч, нотлох баримтыг хадгалах, хамгаалах үүрэг бүхий алба хаагч, ажилтан үйлдсэн бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ гэж тус тус заасан байдаг.