Бүтэн гурван жил гаруй хууль биш хувийнхаа асуудлыг УИХ-ын индэр дээрээс ярьж байгаа хэдэн гишүүн бий. Тэдний нэг нь УИХ-ын гишүүн Н.Номтойбаяр юм.

Энэ хүн 2016 оноос хойш их л олон асуудалд нэр холбогдлоо. Тэдгээрийн нэг нь болох 2019 оны 5 дугаар сарын 17-ны өдөр Б-гийн Төрийн ордонд амиа алдсан хэрэгт мөрдөн шалгах ажиллагааны явцад гэрчээр мэдүүлэг өгөхдөө “худал мэдүүлэг өгсөн” гэх үйл баримтад тулгуурлан прокуророос түүнд эрүүгийн хэрэг үүсгэж яллагдагчаар татаж, одоо мөрдөн байцаалтын үйл ажиллагаа явуулж байгаа юм байна. Үүнийг Нийслэлийн прокурорын газрын ерөнхий прокурор Ш.Нямдорж 2019 оны 12 сарын 3-ны өдөр хэн нэгэн албан тушаалтанд илгээсэн 1/8147 тоот албан бичигтээ дурджээ.

Харин Н.Номтойбаяр өөрөө болохоор “Намайг Г.Батхүүгийн амиа алдсан хэрэгт биш худал мэдүүлэг өгсөн гээд эрүү үүсгэсэн” гэж тайлбарлаж байгаа. Үүнийхээ нотолгоо болгож 2019 оны арваннэгдүгээр сарын 21-нд твиттертээ энэ хэргийн талаар Мөрдөн байцаах албаны даргад гаргасан хүсэлтээ нийтэд дэлгэсэн. Түүндээ “Аравдугаар сарын 31-ний өдөр Мөрдөн байцаах албаны Хэлтсийн дарга н.Эрдэнэбилэг надтай уулзаж “Таныг гэрчийн мэдүүлэг өгөхдөө талийгаач архи уугаагүй гэж худал мэдүүлэг өгсөн буюу Эрүүгийн хуулийн 21.2-т заасан үндэслэлээр прокуророос сэжигтнээр татаж магадгүй” гэв. Тус өдрийн маргааш буюу арваннэгдүгээр сарын 1-ний өдөр миний бие Нийслэлийн прокурорын газрын хяналтын прокурор С.Мөнхгэрэл, ахлах прокурор н.Батболд нартай өмгөөлөгч Н.Мандахын хамт уулзсан. Уулзалтаар ахлах прокурор С.Мөнхгэрэлээс “Г.Батхүү агсны нас барсантай холбогдуулан миний бие хардагдаж сэрдэгдэн шалгагдаж байгаа зүйл бий юу” гэхэд “Тийм зүйл байхгүй” гэсэн хариу өгсөн” гэж бичсэн байдаг.

Хүсэлтийг нь харахаар манай Мөрдөх албаны Хэлтсийн дарга П.Эрдэнбилэг мэдээлэл өгч, Нийслэлийн прокурорын газрын хоёр прокурор Н.Номтойбаяртай уулзаад бас нэг хариу өгсөн гэж ойлгогдсон.

Н.Номтойбаяр өчигдөр /2019-12-12/ Төрийн ордонд сэтгүүлчдэд мэдээлэл хийж дээрх тайлбараа дахин хэлэв. Энэ үеэрээ баахан сэтгүүлч, сурвалжлагч нарын өмнө, телевиз, сайтын камерууд асааж байгаад ЦЕГ-ын Мөрдөн байцаах албаны Хүнд гэмт хэрэг мөрдөн шалгах хэлтсийн дарга П.Эрдэнэбилэг, тус хэлтсийн мөрдөгч Н.Энх-Амгалан нарын утас руу залгаж үзүүллээ. Мэдээж хэрэг, нөгөө хоёр нь утсаа авсангүй. Бүр унтрааж орхив. Гэтэл Н.Номтойбаяр тэдний гар утасны дугаарыг нийтэд зарлаж орхисон. Магадгүй, энэ үйлдлээс хуулийн зөрчил,  гэмт хэргийн шинж чанаар харагдахгүй байж мэднэ.

Гэхдээ маш ноцтой нэг асуудал нь УИХ-ын гишүүн Н.Номтойбаяр тэднийг дарамталдаг уу гэсэн байдал ажиглагдаж байгаа юм.

Бод доо,  ямар нэг байдлаар эрүүгийн гэмт хэрэгт холбогдсон, яллагдагчаар татагдсан хэнбугай ч мөрдөгч, түүний дарга руу утсаар залгаж, нөгөөдүүл нь утсаа салгаж байсан тохиолдол гарч байсан бил үү. Гарсан байлаа ч яллагдагч нь ингэж нийтийн өмнө ингэж аашилдаг бил үү. Ийм олон асуулт араас нь гарч ирж байна. Энэ бүхнийг юу гэх гээд байна гэхээр Монголын цагдаа, прокурорууд яллагдагчдаа дарамтлуулдаг болоо юу гэмээр болж байна.

Энэ бол хүний эрх гэж эрхэм гишүүн хэлэх байх. Тэгвэл гэмт хэрэгт шалгагдаж байгаа яллагдагч бүр мөрдөгч нартайгаа ийм маягаар харьцаж, прокурортойгоо тийм байдлаар харилцдаг бол юу болох вэ.

Ингээд дуусаагүй. Өнөөдөр /2019-12-13/ Нийслэлийн прокурорын газраас УИХ-ын гишүүн Н.Номтойбаяр, түүний зөвлөх нарт хилийн хориг тавих санал ирүүлснийг шүүх хүлээн авахаас татгалзлаа.

Н.Номтойбаяр шүүх хурлын дараа “Нэг зүйлийг хэлэхэд Г.Батхүү агсныг нас барсантай холбоотойгоор хэн нэгнийг яллагдагчаар татах нь байтугай эрүүгийн хэрэг ч үүсгээгүй.

Үнэнээ мэдүүлсээр байтал яагаад худал мэдүүлэг өгсөн гэж цагдаагийн байгууллага гүтгээд байгааг би прокуророос асуусан. Гэтэл прокуророос юу ч хэлж чадахгүй байна. Үүнийг дахиж надтай холбож бүү яриарай.

Сая болсон шүүх хурлаар таслан сэргийлэх арга хэмжээ авах тухай саналыг прокурорын байгууллагаас ирүүлснийг хэлэлцсэн. Шүүх хүлээж авалгүй татгалзлаа. Шүүх шударга байлаа, үүнд талархаж байна” гээд явж одлоо.